Anin Bo’ot Sobu Uma 13 iha Liquisa

DILI – www.news-viptv.com  – Instituisaun Governu ne’ebe durante ne’e responsabiliza ba dezastre, Autoridade Protesaun Civil (APC) rejista uma 13 iha Munisipiu Liquisa ne’ebe hetan estragus tamba anin bo’ot.

Diretor GREC-APC, Cesario Marques iha konferensia imprensa informa, alende uma 13 iha Liquisa ne’ebe hetan estragus tamba anin bo’ot, APC mos rejista estragus hanesan tamba anin bo’ot ba uma komunidade nian 2 iha Munisipu Viqueque, no uma 1 seluk iha Munisipiu Lautem.

Ho uma 16 ne’ebe hetan estragus tamba anin bo’ot, husi periodu 28 Outubro to’o 4 Novembru 2024, APC relata iha uma komunidade nian 19 maka hetan estragus, inklui uma 3 iha Munisipiu Covalima tamba insendiu (ahi-han).

“Komandu Autoridade Protesaun Sivil munisipiu ho parseira relevante fornese asistensia emerjensia  ba iha familia afetadu sira tuir atribuisaun ne’ebé mak ita dehan katak iha emerjensia Autoriedade Protesaun Sivil ba apoiu kedas,” dehan Cesario ba jornalista sira, Sersa (4/11/2024), iha edfisiu APC Kaikoli, Dili.

Nia mos informa husi Janeiru to’o Outubru, hamutuk iha uma komunidade 3,213 ne’ebe hetan dezastre no 3,119 simu ona apoia emerjensia.

Antes ne’e iha periodu 21-28 Outubru 2024, dezastre anin bo’ot mos estragus uma 5 iha Munisipiu Ermera, Aileu 1, no Covalima 1.

Nune’e mos APC rejista uma 6 maka ahi-han ne’ebe akontese iha Baucau 2, Dili 1, Liquisa 1, Oe-cusse 1 no Viqueque 1.