Governu husu Formador Programa HWPL “Edukasaun ba Paz” Halo Kurikulum ba Universidade

DILI, www.news-viptv.com – IX Governu Konstitusional liu hosi Ministeriu Ensinu Superior, Siensia no Kultura husu ba formador programa Heavenly Culture, World Peace, Restoration of Light (HWPL) ne’ebe remata ona formasaun Edukasaun ba Paz bele halo kurikulum ida hodi bele mos implementa iha universidade.

Iha seremonia entrega sertifikadu, Ministru Ensinu Superior, Siensia no Kultura, Jose Honorio Jeronimo kongratula formador sira ne’ebe partisipa ona formasaun ne’ebe organiza hosi HWPL durante semana 7.

“Husu nafatin HWPL bele mai fo treinamentu konaba paz, tamba ita nia rai esforsu ida mak ita tenki koalia konaba paz, ita nia rain iha konflitu barak teb-tebes, tamba ne’e ita tenki hahu husi Edukasaun,” dehan ministru ba jornalista sira, Segunda (29/1/2024), iha Salaun Konferensia MESCC, Dili.

Iha treinamentu ne’e, involve mos universidade UNTL ho UNPAZ ne’ebe iha mos estudu ba paz nian, ne’ebe hosi treinamentu HWPL nian aprende mos estudu ba paz nian iha Korea no sei ajusta hamutuk ho Timor-Leste hodi bele mos sai kurikulum ida.

“Dame ne’e importante iha Timor-Leste tamba ne’e paz ne’e tenki hahu husi ita nia família uma laran rasik ba komunidade ba eskola. Sira tenki koalia paz, tamba ita nia rai presiza hakmatek tamba buat hotu lao ho paz mak ita bele halo buat hotu liuliu desenvolvimentu,” dehan Jose Honorio Jeronimo.

Nu’udar ministeriu ne’ebe tutela ba Ensino Superior sira, nia mos aseita ona atu HWPL bele kontinua programa refere ba manorin iha November ho partisipante hosi Universidade da Paz (UNPAZ), Universidade Nacional Timor Lorosa’e (UNTL), IPBB, ICS, NAroman Esperansa Lauala, ISFET.

“Agradese ba HWPL no Governu Koreanu,” dehan membru governu ne’e.

Iha Setembru 2023, ministru hamutuk ho delegasaun Timor-Leste balun hetan konvite hodi partisipa iha Simera Internasional Paz nian ne’ebe organiza hosi HWPL iha Seoul, Korea Sul ne’ebe partisipa hosi nasaun 120. Iha simera ne’e fahe mos esperensia ba paz no kona ba funu Koreia Sul no Koreia Norte ne’ebe hare malu ladiak.

Membru governu ne’e mos esplika, hafoin partisipa simeira ne’e, HWPL no Universidade balun asina ona memorandum of understanding hodi halo koperasaun oinsa promove dame iha edukasaun.

HWPL nu’udar organizasaun internasional ba dame nian ne’ebe assosiada ba Konsellu Ekonomia no Sosial Nasoens Unidas (ECOSOC) no Departementu Komunikasaun Global Nasoens Unidas.

HWPL Transende diferensia kultura, fiar, relijaun, servisu hamutuk ho lider sira no foin sa’e sira ba esforsu solusaun dame ne’ebe inklusivu no sustentavel hodi transmite esforsu sira ba promosaun kultura dame, refleta kultura selestial sem kores ho valor domin, respeitu ho abundansia. Hanesan lalehan ne’ebe nunka para fornese naroman, udan no aar ba ema hotu hodi bele moris.