Aprende Husi Bali: Media Tour SEKOMS Dudu Transformasaun Media Nasional

Denpasar, www.news-viptv.com – Hodi kontinua hametin ekosistema mídia nasional, Sekretaria Estadu Komunikasaun Sosial (SEKOMS) Timor-Leste hala’o programa Media Tour ne’ebé lori representante mídia nasional 10 husi Timor-Leste ba vizita instituisaun mídia sira iha Denpasar, Bali, Indonézia.

Programa ida-ne’e sai hanesan espasu aprendizajen ba profisionál mídia Timor-Leste atu haree hosi besik dezenvolvimentu mídia modern, liuliu iha era konverjénsia mídia, kresimentu mídia online, no hametin mídia eletrónika hanesan televizaun no rádio.

Media Tour SEKOMS ne’e lidera dereta Sekretariu Estadu Expedito Loro Dias Ximenes akompana Prezidenti Konsellu Imprensa, Cesar Mali no diretor ho xefi redasaun husi media nasional sira ne’e maka reprezentante husi RTTL, Tatoli, VIP TV, GMN TV, STL, Timor Post, Jornal Independente, Dili Post, SAPNews, no SMNews.

Durante loron 15 Janieiru 2026 iha Bali, delegasaun mídia Timor-Leste vizita mídia importante sira, mak Bali TV, Bali Post, DenPost, BRTV, no Radio Republik Indonesia (RRI) Denpasar. Vizita sira-ne’e fó oportunidade ba jornalista Timor-Leste atu aprende kona-ba oinsá mídia lokal iha Bali bele adapta ho mudansa tempu, maski la hasai nia identidade jurnalístika no valor lokal.

“Vizita ne’e importante ba media nasional sira hodi bele halo komparasaun ho media ne’ebe iha bali,” dehan Santina Araujo, Direktur Timor Post.

Iha Bali TV, partisipante Media Tour haree diretamente implementasaun konverjénsia entre televizaun, portal dijitál no mídia sosiál. Apresentasaun notísia ne’ebé lalais, vizuál ne’ebé forte, no jestaun konténu ne’ebé bazeia ba kultura lokal sai pontu importante ne’ebé fó atensaun ba jornalista Timor-Leste.

Vizita ba Bali Post no DenPost fó esperiénsia importante kona-ba transformasaun mídia imprenta iha klaran dezafiu dijitál. Estratéjia diversifikasaun plataforma, hametin jurnalizmu aprofundadu, no integrasaun redaksaun imprenta ho online konsidera hanesan prátika di’ak ne’ebé relevante atu aplika iha Timor-Leste.

Iha BRTV, partisipante sira hetan kompriensaun kona-ba papel televizaun lokal iha hari’i relasaun ho komunidade, liuliu liuhusi konténu bazeia ba komunidade no partisipaun públiku. Abordajen ida-ne’e considera importante ba mídia iha Timor-Leste ne’ebé iha karakter komunidade ne’ebé forte no diversu.

Vizita ba RRI Denpasar kompleta programa Media Tour ho aprendizajen kona-ba jestaun emisaun rádio públiku iha era dijitál. Transformasaun rádio tradisionál ba plataforma dijitál, podcast, no streaming prova katak rádio sei kontinua relevante karik bele inova.

Programa Media Tour ida-ne’e la’ós de’it atividade estudu komparativu, maibé mos sai hanesan espasu diálogu no troka esperiénsia entre profisionál mídia Timor-Leste no Indonézia. Liuhusi atividade ida-ne’e, Ministeriu SEKOMS hein katak mídia nasional Timor-Leste bele hametin profesionalizmu, hasa’e kualidade konténu, no prepara an ba hasoru dezafiu indústria mídia globál ne’ebé kontinua dezenvolve.

Liu husi vizita de’it, Expedito Dias Ximenes espera, Media Tour ida-ne’e sai hanesan pasu estratéjiku atu hari’i mídia Timor-Leste ne’ebé modernu, iha integridade, no hakmatek ba interese públiku, hodi mos apoiu dezenvolvimentu nasional no demokrasia ne’ebé saudavel.

“Ho media tour ne’e espera bele lori inovasaun foun ba redasaun sira iha Timor-Leste hodi serví informasaun ne’ebé kualidade liu ba povu,” dehan membru Governu ne’e.