AFC U23 Asian Cup Kualifikasaun Grupu D, China Manan Timor-Leste 2-1

Xi’an, www.news-viptv.com – Timor-Leste iha nia jogu dahuluk AFC U23 Asian Cup Kualifikasaun Grupu D, tenki rekonese vitoria uma nian China ne’ebe manan mihis 2-1, Kuarta (3/9/2025), iha Xi’an International Football Center.

Maski lakon, selesaun nasional Timor-Leste ne’ebe lidera husi Gali Freitas konsege hatudu jogu kualidade hodi fo mos ameasa ba baliza China.

Joga iha nia uma, China hetan supporta makas husi nia adeptus sira ne’ebe hamean estadiu foin bele halo golu iha minutu 42 husi golu Baihelamu ne’ebe livre sem guarda husi jogador defeza Timor-Leste, konsege aproveita diak bola falta ne’ebe lansa husi nia maluk jogador. Junildo ne’ebe guarda baliza Timor-Leste labele blokeia bola ne’ebe tebe husi ain los Baihelamu nian.

Golu Baihelamu fo kontenti adeptus China sira ne’ebe nunka para hodi hakilar fo apoia ba nia jogador konsege les tan baliza Timor-Leste iha minutu 45 liu ain Wang Yudong.

Timor-Leste iha Segunda parte konsege halo golu hodi muda skoru ba 2-1. Golu Timor-Leste nian ne’e hatama husi Gali Freitas ne’ebe ho matenek bele ola assist husi Luis Figo iha minutu 52 ne’ebe labele antisipa ho diak husi baliza China.

Timor-Leste iha kualifikasaun ne’e hamutuk iha Grupu D ho China, Australia no Northern Mariana Island.

Australia iha nia jogu dahuluk konsege manan bo’ot Northern Mariana Island 14-1.

Timor-Leste iha jogu daruak sei hasoru Australia iha 6 Setembru 2025 no Northern Mariana Island iha 9 Setembru 2025.

Skuad Timor-Leste: Junildo Pereira (12, GK), Jackson Fowler (4), Aidan Pereira (5), Palomito Antonio (6), Kenny Ximenes (7), Olagar Xavier (9), Mario Quintão (17), Freteliano Santos (16), Luis Figo (19), Gali Freitas (21, C), no Anizo Correia (23).

Supplentes: Filonito Nogueira (1), Ricardo Bianco (2), Liam Farrugia (3), Oatnasio Guterres (8), Alexandro Lemos (10), Zenivio Mota (11), Jonatas Freitas (13), Leonio Guilton (15), Vabio Pires (18), Egidio Oliveira (20), Sandro Quintão (22)