OJE 2026, SEKOMS Tau Osan US$ 200,000 ba Formasaun Jornalista

Dili, www.news-viptv.com – Sekretaria Estadu Komunikasaun Sosial (SEKOMS) iha Orsamentu Jeral Estadu (OJE) tinan 2026 tau ona osan US$ 200,000 ba formasaun jornalista ne’ebe sei jere liu husi Konsellu Imprensa.

Alokasaun orsamentu ba formasaun jornalista ne’e fo sai husi Sekretariu Estadu Komunikasaun Sosial (SEKOMS), Expedito Dias Ximenes hafoin inkontru trimestral SEKOMS ho xefi redasaun no editor media sira, Kinta (9/10/2025), IHA Palacio do Governo, Dili.

“Hau sei kordena ho Konsellu Imprensa atu hare formasaun ne’ebe govervu fo, aloka osan ba konsellu Imprensa ne’e bele servisu hamutuk ho organizasaun jornalista sira ho media nain sira atu bele konseitu formasaun ne’ebe konsellu Imprensa hakarak halo iha 2026 ne’e bazea duni ba sira nia hakarak,” dehan Expedito.

Membru governu ne’e hateten iha inkontru trimestral ikus iha Dezembru, husu ba media nain sira atu hola prezensa nune’e bele hare konseitu foun ne’ebe hato’o husi media nain sira katak SEKOMS bele fo apoia direta ba media sira sem liu husi organizasaun jornalista nian.

Alende koalia kona ba formasaun ba jornalista iha tinan 2026, inkontru refere mos koalia kona ba preparasaun tinan 50 Balibo V no mos kobertura iha seremonia adezaun Timor-Leste ba ASEAN.

Diretora VIP TV, Agida dos Santos hateten, ba OJE 2026, iha alokasaun orsamentu labele deit ba formasaun jornalista, maibe oinsa bele re-ativa hikas apoia orsamentu ba programa desiminasuan informasaun liu husi Plataforma media hotu, inklui online.

“Iha inkontru SEKOMS koalia katak media online mos nu’udar pilar importante iha komunikasaun sosial, nu’udar media online, laos ami husi VIP TV deit, espera programa uluk ne’ebe SEKOMS implementa iha 2024 bele halao fali, tamba liu husi programa ne’e bele apoia media online sira haforsa sira nia programa ba atividade governu nian,” dehan Agida dos Santos.

Nune’e mos Nuryanti Fatima nu’udar jornalista VIP TV hare katak formasaun ba jornalista ne’ebe SEKOMS programa ona ho Konsellu Imprensa ba tinan oin labele halo deit ba formasaun baziku jurnalismu nian, maibe bele espesifiku liu.

“Hau nia hanoin ne’e ita jornalista ona, labele fo tan formasaun ba jurnalismu baziku nian, maibe ba espesialidade liu tan, ida ne’e maka hau nian hakarak,” hateten jornalista VIP TV ne’ebe durante ne’e destaka iha Palacio Prezidensial.