SEKOMS Lansa Radio Comunidade Balibo 5

Balibo, www.news-viptv.com – Sekretáriu Estadu Komunikasaun Sosial (SEKOMS), Expedito Loro Dias Ximenes, lansa Radio Comunidade Balibo 5 (RCB5), Kuarta (15/10/2025).

RCB5 ne’e, esplika SEKOMS Expedito Loro Dias Ximenes, importante hodi fo omenajem ba jornalista Australianu nain 5 ne’ebe mate iha Balibo tamba halo kobertura ba funu ne’ebe akontese iha tinan 1975.

“Istoria los tamba edifisiu simples ida-ne’e, istória tamba jornalista nain5, ita hotu konese katak iha situasaun difisil, jornalista nain 5 husik hela sira nia servisu no sira nia familia, i ho sakrifisiu bo’ot, defende lia los, defende dalan los, husik defende ita nia liberdade no direitu Timor-Leste nian. Tamba ne’e, edifisiu ida ne’e mak tau naran Radio Comunidade Fronteira Balibo 5 atu bele fo omenajem, fo ita nia respeitu no obra no gloria ba ita nia jornalista nain 5,” dehan Expedito Dias Ximenes.

Ho RCB5 ne’e, Timor-Leste dadauk ne’e iha ona radio komunidade hamutuk 22 no sei aumenta tan wainhira Radio Komunidade Baguia (Baucau) no Fatumean (Covalima) estabelese.

Nono Governu Konstitusional fo prioridade ba Radio Komunidade sira tamba radio komunidade maka lina frente ba informasaun iha komunidade.

“Lina frenti tamba nia radiu komunidade ne’e forma ou kria husi komunidade ne’e rasik. Governu apoiu de’it ba oinsa nia dezenvolvimentu ba iha jestaun nomos ba iha ekipamentus ne’ebe presija liuliu ba iha transmisaun radiu ne’e nian. Governu senti katak ida ne’e labele sai bem instrumentu ba iha propaganda balu ke la apoiu ba komunidade. Tamba radiu komunidade nia papel prinsipal maka nia atu atende atividade komunidade nian,” nia hateten.

SEKOMS mos imforma katak, tinan oin sira sei apoiu tan radiu komunidade rua iha Baguia ho fatumea, sira hato’o ona sira nia proposta mai no pedidu.

Ba estabelesementu RCB5, SEKOMS apoiu osan ho montante US$ 20,000 resin.

Iha fatin hanesan  Admistrador Postu Balibo Casimiro dos Santos hato’o nia agradesementu ba SEKOMS ne’ebe fo ona apoia orsamentu hodi estabelese RCB5.

“Edifisiu foun ida ne’e, mak durante ne’e ami nia esperansa hein kleur teb-tebes, maibé  agora dadauk realiza duni. Agradese mos ba Nono Governu Konstituisional ne’ebe mak rona duni ami komunidade Postu Balibo nia halerik,” dehan Casimiro dos Santos.

Jestór RCB5, Samuel dos Santos Soares hateten, durante ne’e sira mos hasoru difikuldade iha lina internet ne’ebe la diak no mos menus ekipamentu servisu.

“Ami iha de’it komputador ida hodi halo servisu, ami iha mós problema kona-ba sekuensia rádiu ne’ebé labele perkore Balibo laran tomak, tanba lina internet ne’ebé la diak, maibé nu’udar jestór iha tempu badak nia laran ha’u sei halo pedidu ida ba iha SECOMS atu bele rezolve problema sira ne’ebé mak ami enfrenta, atu nune’e ita bele garante katak rádiu ida ne’e bele sai di’ak liu tan iha futuru,”nia hateten.