Indonesia Sei Hari’i Muzeu Amizade RI-TL iha TMII Jakarta

DILI, www.news-viptv.com  – Rekonese Timor-Leste uluk nu’udar parte husi Republika Indonesia (RI), Ministru Kultura Indonézia, Fadli Zon hateten Indonesia sei hari’I Muzeu Amizade RI-TL (Timor-Leste) iha Taman Mini Indonesia Indah (TMII) Jakarta.

Fadli Zon informa assuntu ne’e ba jornalista sira hafoin hamutuk ho Ministru Juventude, Desportu, Arte no Kultura Nelyo Isaac Sarmento hasoru Primeiru Ministru Xanana Gusmão, Tersa (7/10/2025), iha Palacio do Governo, Dili.

“Ami hare’e buat barak ne’ebé hanesan iha kultura, espresaun, no valór sira entre Indonézia no Timor-Leste. Iha futuru, ami mós planu atu harii Muzeu Amizade Indonézia Timor-Leste iha Taman Mini Indonézia Indah (TMII), hamutuk mós ho ha’u iha ne’e maka Prezidente Interinu Diretór TMII nian,” dehan Fadli Zon ne’ebe hetan akompanamentu Embaixador Indonesia iha Timor-Leste, Okto Dorinu Manik.

Nia esplika, hein katak, muzeu ida ne’e bele sai hanesan ponte kultura ne’ebe hametin relasaun entre nasaun rua liu husi diplomasia kultura.

“Uluk TMII, iha pavilhaun Timor-Timur,  agora Timor-Timur sai ona nasaun Timor-Leste, ami hakarak transforma nia ba muzeu ida ne’ebé hatudu Timor-Leste nia amizade no kultura. Ba oin, Timor-Leste nia kultura no obra sira mós bele hatudu iha ne’ebá,” nia hateten.

Iha hasoru malu ho PM Xanana, nia esplika tan, Xefe Governu rasik iha komprensaun klean kona-ba Indonézia no koñesidu ho nia sentidu humor. Maibé, aspetu importante liu iha enkontru ne’e mak oinsá bele kolabora ho Ministru Kultura Timor-Leste hodi dezenvolve atividade konjunta sira, liuliu ba jerasaun foin-sa’e sira, hanesan rezidénsia kulturál sira, troka artista sira, workshop, halo filme hamutuk, no programa kolaborativu sira seluk.

Festival Kultura ne’ebe Timor-Leste realiza iha fronteira, esplika Ministru Kultura Indonesia ne’e, nu’udar ministru no governu sentral apoia tebes no sei mantein atividade ne’e kontinua ba bebeik.

“Ami iha apoia maka’as festivál kulturál oioin ne’ebé hala’o iha área fronteira sira, hanesan iha Atambua no rejiaun sira seluk, ami mós sei kolabora ho governu rejionál iha Nusa Tenggara Timur, hodi asegura katak festivál sira ne’e kontinua buras. tuir tradisaun no kulturál, ema sira hosi rejiaun fronteira ida-ne’e iha relasaun besik. tanba ne’e, atividade hirak ne’e bele sai hanesan plataforma importante hodi hametin relasaun di’ak entre nasaun rua ne’e,” nia dehan.

Nia mos hateten, sei konvida Timor-Leste hodi partisipa konferensia ida iha Indonesia kona ba Sinerjia Kulturál Indonézia-Pasífiku.

“Ida ne’e hanesan plataforma foun ida hodi hametin kooperasaun kultura entre nasaun sira iha rejiaun Pasífiku,” esplika ministru kultura Indonesia ne’e.

Iha Fatin hanesan, Ministru Juventude, Desportu, Arte no Kultura, Nelyo Isaac Sarmento apresia ho vizita Fadli Zon nu’udar Ministru Kultura mai Timor-Leste no sei hametin liu tan kooperasaun bilateral iha area kultura nian ne’ebe sei kesi liu husi akordu intendementu entre nasaun rua.

“Kooperasaun nasaun rua ne’e laos deit iha relasaun politika, maibe Ita halo no hakbesik an liu hosi ita nia kultural,” dehan Nelyo Isaac.