Kualifikasaun AFC Asian Cup 2027, Timor-Leste Lakon 1-4 Kontra Filipina

DILI, www.news-viptv.com – Golu hat avansadu Filipina, Bjorn Kristensen ba Timor-Leste, lori ekipa Lafaek tenki simu rezultadu derota 4-1 husi nia adversariu iha jogu kualifikasaun Grupu A AFC Asian Cup Arabia Saudi.

Ho Estadiu ne’ebe Timor-Leste laiha tuir standar FIFA, FFTL nu’udar federasaun kontinua hili Stadion Territory Rugby League, Darwin, Australia sai home ba jogu kontra Filipina ne’ebe realiza iha Kinta (9/10/2025).

Iha jogu ne’e, Kristensen ne’ebe joga iha klube futeból ba KFUM Oslo, loke nia golu dahuluk iha minutu 15. Golu daruak akontese iha minutu 31, ho avansadu ne’ebé simu bola iha nia parte rasik molok ultrapasa defeza Timor-Leste no hatama ba uma.

Kapitaun Timor-Leste, Gali Freitas konsege hatama golu iha minutu 47 hodi hamihis skoru sai 2-1. Golu Gali Freitas ne’e selebra lais deit husi Timor-Leste tamba liu minutu 2, Kristensen halo tan golu iha minutu 49 hodi habo’ot skoru sai 3-1 no taka nia golu ikus iha minutu 56 hodi lori Filipina manan Timor-Leste 4-1.

Ho derota ne’e maski Timor-Leste hetan ona pontus 3 wainhira manan Maladewa 1-0 no lakon 0-1 husi Tajikistan, tenki simu tuur iha pozisaun datoluk.

Jogu tuir mai, Timor-Leste sei hasoru hikas Filipina iha 14 Outubru 2025, kontra Tajikistan iha 18 Novembru 2025 no ikus hasoru Maladewa iha 31 Marsu 2026.