Portal Eskola Importante ba Promosaun ESTV

DILI, www.news-viptv.com – Hodi halo promosaun ba ida-idak nia eskola, kriasaun portal eskola importante tebes ba promosaun Eskola Sekundaria Tekniku Vokasional (ESTV).

Asuntu ne’e hato’o husi Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos ba jornalista sira hafoin loke workshop ba Diretór Munisípiu sira no Diretór Eskola Téknika Vokasionál sira ho tema Dijitalizasaun eskola Téknika Vokasionál no Avaliasaun Dezempeñu ba diretiva eskola Téknika Vokasionál, iha salaun Ian Martin INFORDEPE, Kuarta (19/3/2025).

“Digitalizasaun laos ita selu maibe ita hare deit ba website (portal) eskola sira, tamba dala barak publik nia ejizensia katak eskola teknika vokasional barak mak ejiste maibe sira lahatene prosesu andamento eskola teknika vokasional iha ita nian rain, tamba ida ne’e mak politika ne’ebe mak iha katak primeiro kria website eskola sira atu halo promosaun ba sira nia eskola rasik,” hateten Domingso Lemos.

Iha nia intervensaun, sekretariu estadu ne’e hateten, edukasaun mak baze Dezenvolvimentu ba sustentável ba nasaun ida nian, iha kestaun ida ne’e ESTV hala’o papél esensiál hodi prepara estudante sira atu hasoru dezafiu sira iha merkadu traballu nian no kontribui ba progresu nasaun nian.

“Dijitalizasaun no avaliasaun dezempeñu ne’ebé ami sei aborda iha ne’e mak pilár fundamentál sira atu asegura katak ami nia eskola sira mak fatin inovasaun nian,” hateten Domingos Lemos.

Workshop ne’e, esplika membru governu ne’e, mosu hanesan Plataforma ida hodi troka ideia fahe prátika di’ak no harii solusaun ne’ebé adapta ba realidade eskola sira nian. tamba ne’e nia husu ba Diretór Eskola sira katak mundu agora mundu Dijitalizasaun hotu-hotu atu adapta ho situasaun sira ne’e, eskola Téknika Vokasionál importante loos atu responde merkadu traballu.

Iha workshop ne’e, Diretór Ezekutivu Teknologia Informasaun no Komunikasaun (TIC Timor), Venancio Pinto partilla buat rua mak hanesan, Governu Eletróniku no Dijitalizasaun.

“Ajénsia TIC Timor agora halo servisu ho Ministériu Edukasaun iha área barak ona, ne’ebé mak dezevolve iha diskusaun hodi lori prosesu ba oin kona-ba dijitalizasaun rezistamentu avaliasaun no Ezame,” dehan Venancio.