USAID-FONGTIL Lansa Plataforma E-Learning Hakbi’it ONG Lokal

DILI, www.news-viptv.com – Atu haforsa koordenasaun, konsultasaun no kooperasaun entre organizasaun sosiedade sivil sira iha Timor-Leste, United State Agency for Internacional Development (USAID) ho Forum Organizasaun Naun Govermentais Timor-Leste (FONGTIL) lansa plataforma e-learning hodi hakbi’it ONG local.

Lansamentu ne’e lansa dereta hosi Diretur Missaun Interinu, Mark Anthony White, hamutuk ho Vise Primeiru Ministru no Ministru Koordenador Assuntu Sosial (MKAS) e Ministru dezemvolvimentu Rural no Habitasaun Komunitaria, Mariano Assanami Sabino no mos Diretor Ezekutivu FONGTIL, Valentim da Costa Pinto, Segunda (22/1/2024), iha Hotel Timor, Dili.

Plataforma ne’ebe lansa ne’e sei jere husi FONGTIL ho nia objetivu alende atu haforsa koordenasaun, konsultasaun, no kooperasaun entre organizasaun sosiedade sivil sira, atu promove mos partisipasaun iha aprendijajen online no haforsa kapasidade no disponibiliza fahe informasaun no rekursu aprendijajen sira ba malun ho efetivu.

“Ho lansamentu inisiativa transformativu ida ne’e, Estadus Unidus Amérika re-afirma ninia komitmentu ba Timor-Leste ninia dezenvolvimentu,” dehan Diretur Misaun Interinu USAID, Mark Anthony White.

Lansamentu ida ne’e finansia no apoiu tekniku husi USAID nia Atividade ba Sustentabilidade Sistema Saúde no USAID/Timor-Leste nia Atividade ba ONG nia Advokasia ba Boa-Governasaun. Plataforma E-learning ida ne’e sei fortalese engajamentu siviku no advokasia ba haforsa sistema saúde no hasa’e ONG nivel médiu sira nia kapasidade.

“Hodi ONG Timor-Leste hotu nia naran, hau hakarak hato’o agradese wa’in ba Governu Amérika ba ninia apoiu tékniku no finanseiru ne’ebe boot ba iha lansamentu Plataforma aprendijajen ida ne’e,” hateten Diretur Ezekutivu FONGTIL, Valentim da Costa Pinto.

Nia mos hateten, FONGTIL ho apoia hosi governu mos sei kontinua nia papel hodi halao programa auditoriu sosial hodi justifika espasu siviku partisipasaun sidadaun sira nian iha politika poder nian.

“Ita atu garantia Timor Leste ida ne’ebe Labele moris iha forma atu de injustisa sira, labele iha esplorasaun, labele iha diskriminasaun, no labele iha korupsaun. Hakarak kontinua promulga boa governasaun iha ita nia rain tamba ne’e sosiedade sivil hakarak kontinua sai parseiru kritiku ba estado hodi halao Prosesu konstituisaun estado nian. Ida ne’e mak visaun no misaun FONGTIL nian ba tinan ida ne’e,” dehan Valentim ba jornalista sira