Rai Nakdoko iha Haiti, 1.297 Mate

DILI, news-viptv.com – Ema nain 1.297 mate iha Haiti, tamba dezastre rai nakdoko ho forsa Magnitudo 7.2.

Nasaun vizinu sira mos haruka ona apoiu ba Haiti hafoin rai nakdoko, ekipa salvasaun mos kontinua buka lais vitima sira tantu moris no mate tamba hetan hanehan hosi sira nia uma ne’ebe monu no rahun.

Reuters relata, Xefi Seguransa Sivil Haiti, Jerry Chandler, informa ospital sira susar hodi simu 5.700 pasienti ne’ebe kanek tamba rai nakdoko razaun tamba ospital mos hetan estragus.

Haiti dadauk ne’e “ulun moras” ho pandemia Covid-19, ameasa Siklone Grace, situasaun politika hafoin sira nia Prezidenti Jovenel Moise, mate tamba hetan oho iha 7 Jullu liu ba, krizi ekonomia no asaun violensia no krimi ne’ebe halao hosi grupu “geng” sira.

Fasilidade sira hanesan Igreja, hotel to’o eskola hetan estragu tamba rai nakdoko. Inklui prizaun iha Les Cayes ne’ebe besik ho sentru rai nakdoko mos hetan estragus no situasaun halo prizineiru sira halai sai.

Hamutuk uma 13.694 rahun (monu) no uma 13.785 hetan estragu todan iha area tolu ne’ebe hetan impaktu todak hosi rai nakdoko.

Governu Haiti dadauk ne’e, permiti instituisaun umanitaria hodi harii lona emerjensia, maibe tenki tuir protokolu hosi ministeriu sira ne’ebe relevante ba jestaun desastre nian.

Voluntariu internasional sira, mediku no ekipa salvasaun dadauk ne’e  iha ona aeroportu Port-au-Prince hodi ba Les Cayes.

Predisaun Siklonu Grace ne’ebe sei akontese iha Segunda bele rezulta udan bo’ot no hamosu inundasaun.

“Ami mos prepara an hela hodi hasoru Siklonu Grace,” dehan Chandler.

Dadauk ne’e, kuaze ema atus ba atus iha Les Cayes no besik iha area refere toba iha uma liur tamba sira nia uma hetan estragus hotu.