Entrega Karta Kredensial, Donna Ann Welton Embaixadora EUA ba Timor-Leste

DILI, www.news-viptv.com – Prezidente Republika (PR), Jose Ramos-Horta, simu Karta Kredénsia husi Sra. Donna Ann Welton, Embaixadora Extraordináriu no Plenipotensiáriu foun Estadus Unidus América nian ba Timor-Leste.

Serimónia ofisiál ne’e realiza iha Palásiu Prezidensiál Nicolau Lobato, Tersa (16/7/2024).

Embaixadora Welton lori experiénsia servisu liu dékada tolu iha Servisu Estranjeiru Estadu Unidos Amerika nian ba nia pozisaun foun. Nia karreira diplomátika ne’ebé luan inklui pozisaun xave sira iha Ázia, Europa, no Médiu Oriente, ho papel importante sira hanesan Adjunta Assistente Sekretária Interina, Assistente Xefe ba Misaun iha Kabul, no Adjunta Xefe ba Misaun iha Helsinki. Embaixadora Welton nia esperiénsia oioin, ne’ebé inklui perísia iha arte Japoneza no estudu estratéjiku iha Army War College, hamutuk ho nia fluênsia iha lian Japonés no profisiénsia iha lian barak inklui Indonézia, sei serve di’ak ba nia bainhira nia asume postu importante ida ne’e.

Estadus Unidus Amerika sai ona parseiru ida-ne’ebé metin iha Timor-Leste nia viajen ba independénsia no kontinua hala’o papel importante iha dezenvolvimentu nasaun nian.

Programa asisténsia EUA nian iha Timor-Leste inklui USAID nia asisténsia dezenvolvimentu, kooperasaun seguransa, formasaun ba aplikasaun lei, Korpu ba Pas, no projetu Millennium Challenge Corporation ne’ebé foka ba saneamentu bee no edukasaun.