PR Ramos-Horta Simu Karta Kredensial Husi Nasaun 12

DILI, www.news-viptv.com – Prezidente Republika (PR), Jose Ramos-Horta, simu Karta Kredénsial husi Embaixadór sira ne’ebé reprezenta nasaun sanulu-resin-rua, Kuarta (19/2/2025), iha Palásiu Prezidensiál Nicolau Lobato.

Serimónia kredénsial ne’e marka inísiu formál ba misaun diplomátika ba Embaixadór sira nian ba Timor-Leste no subliña relasaun internasionál nasaun nian ne’ebé buras daudaun.

Prezidente Ramos-Horta hato’o benvindu ba Embaixadór sira ne’ebé foin akreditadu mai Timor-Leste no espresa ninia kompromisu atu hametin relasaun bilaterál ho sira-nia nasaun ida-idak.

“Serimónia ohin nian reprezenta pasu importante ida iha viajen diplomátika Timor-Leste nian,” hateten Prezidente Ramos-Horta. “Ho espansaun ba parseria diplomátika iha kontinente tomak, ami kria oportunidade foun ba kooperasaun. Nu’udar demokrasia foin-sa’e ida, ami valoriza relasaun internasionál sira-ne’e ne’ebé ajuda hametin ami-nia pozisaun iha komunidade globál enkuantu avansa ami-nia kompromisu komún ba pás no prosperidade.”

Prezidente subliña importánsia kooperasaun internasionál hodi responde ba dezafiu globál sira no avansa objetivu komún ba pás, seguransa, no dezenvolvimentu sustentável.

Embaixadór nain 12 ne’ebe mak aprezenta sira-nia kredensiál mak hanesan tuir mai ne’e:

1. Armin Limo, husi Bósnia-Herzegóvina
2. Maynor Jacobo Cuyún Salguero, Guatemala
3. Jessica Maria Lópes Piña, Venezuela
4. Prof. Dr. Talip Küçükcan, Turkia
5. Sergei Gennadievich Tolchenov, Rúsia
6. Marc Gerritsen, Olanda
7. Tomas Ferko, Eslováka
8. Roberto Colamine, Itália
9. Eliyahu Vered Hazan, Israel
10. Tanya Dimitrova Dimitrova, Bulgária
11. Herman Pule Diamonds, Namíbia
12. Dianela Joselina Pi Cedras, Uruguai

Embaixadór sira hato’o saudasaun no dezeju di’ak husi sira-nia Xefe Estadu no afirma sira-nia dedikasaun atu haforte ligasaun diplomátika ho Timor-Leste.

Serimónia kredensiál ida-ne’e reflete Timor-Leste nia esforsu sira ne’ebé kontinua atu habelar nia ain-fatin diplomátiku no envolve ho komunidade internasionál iha rejiaun oioin.