PR Ramos-Horta Kondekora Embaixador Brasil ho Ordem Colar Timor-Leste

DILI, www.news-viptv.com – Prezidente Republika no Laureadu Nobel ba Pás, J. Ramos-Horta kondekora Orden Honorifika Timor-Leste nian iha kategoria Kolar ba Embaixadór Repúblika Federativa Brazil nian ne’ebé rezidente iha Timor-Leste, Sr. Maurício Medeiros de Assis.

Orden Honorifika ne’e kondekora hodi rekoñese ninia dedikasaun ezemplár no susesu boot durante nia misaun diplomátika tinan tolu iha Timor-Leste. Serimónia ne’e hala’o iha Loron 28 Fulan Maio 2024, iha  Palásiu Prezidensiál Nicolau Lobato.

Embaixadór Assis iha ona karreira tinan 25 iha Servisu Estranjeiru Brazil nian, ne’ebé servisu iha misaun diplomátika Brazil nian sira iha Madrid, Sydney, Hanoi no Shanghai, molok hala’o nia knaar nu’udar Embaixadór ba Timor-Leste iha Dezembru 2020.

Iha nia lideransa, Brazil fó ona apoiu ne’ebé boot ba Timor-Leste liu husi akordu kooperasaun hamutuk 23 ne’ebé eziste ona ne’ebé mak hanesan edukasaun, administrasaun públika, justisa, defeza, seguransa, formasaun profisionál, saúde no seluk tan.