Run for Palestine, Xefi Estadu Autoriza Uza Atributu Palestina iha Dili International Marathon

Dili, www.news-viptv.com – Prezidente no Laureadu Nobel da Pás, Jose Ramos-Horta iha atividade Dili International Marathon 2025 ne’ebe sei realiza iha Sabadu (11/10/2025), autoriza atleta no korredor sira bele uza atributu Palestina hodi solidaridade ba Palestina tuir tema atividade nian run for Palestine.

Tema ba maratona tinan ida ne’e, “Halai ba Palestina,” hili atu reflete Timor-Leste nia kompromisu istóriku no metin ba justisa, no Pás ba povu Palestina. Ida-ne’e aliña ho prinsípiu prinsipál sira ne’ebé maka ita-nia nasaun harii.

“Ita-nia luta rasik ba independénsia harii iha fundasaun solidariedade internasionál nian. Iha espíritu hanesan ne’e mak agora ita hamriik hamutuk ho povu Palestina nian,” afirma Prezidente Ramos-Horta.

Nia hateten tan, “Haree korredór sira ne’ebé lori bandeira Palestina nian ka uza nia kór sira iha dalan sira Dili nian sei sai hanesan testamentu ida ne’ebé emosionante ba ita-nia umanidade ne’ebé fahe no ita-nia esperansa koletiva ba Pás ida ne’ebé justu no duradoura. Maratona hanesan símbolu ida ba rezisténsia no espíritu umanu, no laiha dalan ida ne’ebé apropriadu liu mak atu kanaliza enerjia ida ne’e hodi bolu ba Pás no solidariedade”.

Ajunta Xefi Casa Sivil, Henriqueta Maria da Silva iha konferensia imprensa hateten, Dili Internasional Marathon 2025 tinan ne’e laos deit fo solidaridade ba Palestina, maibe atu selebra mos Timor-Leste sai membru ASEAN ne’ebe ofisialmente sei sai membru ba dala 11 iha Outubru 2025.

“Tempu ida ne’e anunsiu mós ba públiku, liu husi eventu ida ne’e katak, bainhira ita tama ba ASEAN ita sei tama ho kontribuisaun ba paz, kontribuisaun ba respeita malu, solidaridade hanesan fraternidade, nomos oinsa ita avansa hamutuk iha prosesu dezemvolvimetu tomak iha rejiaun ida ne’e nomos kontribui ba mundu. Ida ne’e mak intensaun tanba sa mak ita halo Dili Internasional Marathon 2025 Run for Palestine, halai ba Paz, halai Solidaridade ba Palestine nia sofrementu, nomos oinsa ita selebra adezaun ba ASEAN,” dehan Henriqueta.

Prezidente Federasaun Atletismo, Afranio Xavier informa Dili Internasional Marathon 2025 ba atleta Marathona hamutuk iha atleta 49. Alende ne’e rejista mos atleta meia marathona 450 atleta, 3KM hamutuk atelata 1,500, no Para Atletismo 50 atletas.

Ba numeru 3KM loke ba labarik ho idade 8 to 14 anus, ba sosiedade no populasaun tomak ne’ebe iha Dili laran.

“Enkuantu 10KM ne’e espesial liu ba Para Atletismo, 21km ho 42km ne’e ho distansia la hanesan rutin hanesan ida ne’e mak sei compete,” hateten Afranio.

Prezidente Autoridade Munisipiu Dili, Francisco do Santos hateten, atutoridade Dili ho Seguransa garante katak eventu refere sei lao diak.

“Ami mós liu tiha ona husi konsellu konsultivu munisipal nian horseik, hau lansa tia ona ba iha Xefi suku sira hotu para atu bele organiza Komunidade sira, liuliu iha rutin ne’ebe sei ultra pasa no horseik hau fo hatene kedas,” hateten Francisco Santos.

Dili Internasional Marathon 2025 realiza husi Palasiu Prezidenti ho kooperasaun Ministeriu Juventude, Desporto, Arte no Kultura (MJDAK) ho Federasaun Atletismu Timor-Leste (FATL).