PR Ramos-Horta Simu Karta Kredensial Husi Embaixador Argentina, Chile no Ghana

DILI, www.news-viptv.com – Prezidente Jose Ramos-Horta simu Karta kredensiál husi Embaixadór foun sira ne’ebé foin nomeadu husi Repúblika Argentina, Repúblika Xile no Repúblika Ghana iha serimónia ida-ne’ebé hala’o iha Loron 28 Fulan Maiu 2024, iha Palásiu Prezidensiál Nicolau Lobato.

Embaixador sira ne’e maka Gustavo Ricardo Coppa nu’udar Embaixadór Argentina, rezidente iha Jakarta, Indonesia. Mario Ignacio Artaza Loyola husi Repúblika Xile rezidente iha Jakarta, Indonesia, No Florence Buerki Akonor husi Repúblika Ghana, rezidente iha Kuala Lumpur, Malázia.

Prezidente Repúblika kongratula Embaixadór foun na’in tolu no hein atu servisu hamutuk ho sira hodi promove ajenda bilaterál sira, reforsa ligasaun amizade nian no esplora parseria ne’ebé benefisia malu iha setór oin-oin iha tinan hirak oin mai.

Diretor Jeral MNEK ba assuntu Bilateral ba kontinente amerika no afrika, Francisco Dionisio Fernandes Maukura esplika koperasaun ne’ebe nasaun tolu ne’e sei kopera ho Timor-Leste maka ho Argentina iha area Agrikultura, Enerjia Renovadu, no Desportu, Chile iha area peska, ho Ghana sei dezemvolve area kapital humanu ba kapasitasaun diplomatiku nian.