Timor-Leste Lansa Kandidatura ba Konsellu Diretus Úmanus ONU

DILI, www.news-viptv.com – Prezidenti Republika, Jose Ramos-Horta hamutuk ho Ministra Negosiu Estranjeiru no Kooperasaun, Adaljiza Magno halo lansamentu offisial ba kandidatura Timor-Leste nian ba Konsellu Diretus Umanus Organizasaun Nasoins Unidas (ONU).

Iha nia deskursu, Prezidenti republika Ramos-Horta hateten, maske nudar nasaun kiik, kandidatura Timor-Leste nian ne´e hatudu vontade atu servisu makas ba diretu umanus hodi promove dignidade sidadaun sira.

“Kandidatura Timor Leste nian ba membru Konsellu Direitus Humanus bele manán tan esperensia ruma hodi haforsa luta Timor Leste nian ba defende no promove direitus umanus,” dehan xefi estadu, Tersa (26/7/2022)

Ho candidatura Timor-Leste nian ne´e, Xefe Estadu hein katak Timor Leste sei manán iha eleisaun atu sai membru Konsellu Direitus Umanus ONU nian ne´e.

Iha fatin hanesan, Ministra Adaljiza Magno hateten, maski pratikamente Timor-Leste sedauk iha esperensia sai membro ba organizasaun internasional sira, liliu iha ONU ou iha organizasuan multilateral sira, kandidatura Timor-leste nian ne´e bele hatudu oinsa nasaun ne´e iha hot unia kapasidade atu kontribui ba rezolve asuntu internasional.

“Ho ida ne´e ita komesa uluk ho komisaun diretus umanus, depois orsida ita iha kapasidae liu tan bele alarga ba komisaun seluk,” dehan Ministra Adaljiza Magno.

Ministra mos fiar katak, ho esperensia ne´ebe Timor-Leste iha hanesan rezolve problema barak iha post konflitu rezolve ho paz no estabilidade, no mos rekonsiliasaun, inklui ratifikasaun konvensaun 7 hosi 9 ne´ebe Parlamentu Nasional ratifika ona hatudu Timor-Leste dadauk ne´e sempre valoriza diretus umanus iha nia kontrusaun estadu.

Eleisaun ba membro Konsellu Diretus Umanus ONU nian sei realiza iha Outubru 2023 no nasaun ne´ebe eleitu sei kaer mandatu durante período 2024-2026.

Dadauk ne´e hamutuk iha 47 nasaun maka sai membro ba Konsellu Diretus Umanus. Nasaun 47 ne´e kompostu hosi Asia-Pasifiku iha 13, Afrikanu (13), Amerika Latina no Karibean (13), Europeia Osidental ho seluk (7), no Europeia Leste (6)