Dili, www.news-viptv.com – Atu moris ne’e hetan protesaun, salvasaun no bensaun hosi Nai Maromak, Kristaun tenki iha fuan ne’ebe besik no metin ba Maromak, hanesan Gosen.
Pastora (Psa) Carolina Angkie Wattimena iha nia pregasaun Kultu Domingu (7/1/2024) iha Igreja IBTL Bethany hateten, Gosen rai ida iha Ejiptu ne’ebe José (Jaco nia oan mane) fo ba jerasaun Jaco nian wainhira akontese hamlaha naruk.
“Maromak Nia Lia Fuan iha Jenesis 45:10-11, (10) Ita sei hela iha rai Gosen, hodi ita hela besik hau, ita, no ita nia oan sira no ita nia bei-oan sira, ita nia bibi lubun sira, ita nia karau lubun sira no buat hotu nebee ita iha. (11) No iha nebaa hau sei foo haan ba ita, tanba rai hamlaha sei lao too tinan lima tan. Keta halo be ita no ita nia uma kain no buat hotu nebee ita iha sai kiak liu,” dehan Psa. Carolina Wattimena hodi esplika Rai Gosen nia signifikadu iha Maromak Nia Lia Fuan Santo.
Maski nia maun-alin sira fan José ba ema seluk, maibe José nunka tau odiu ba nia maun-alin no ho ninian pessoal nebee hamtauk ba Maromak, nia fiar nafatin katak prezensa ninian iha rai Ejiptu tamba Maromak Nia Planu no ikus Maromak hili nia sai ukun nain ba Rai Ejiptu.
“Ho José nian fuan ne’ebe metin ho Maromak, José sempre hetan protesaun hosi Maromak, laos deit protesaun mai ema ne’ebe iha fuan metin ba Maromak hanesan José, sempre hetan atensaun espesial hosi Nai Maromak no nia moris sempre hetan tulun ka ajuda no salvasaun hosi Maromak,” esplika pastora ne’e iha nia pregasaun.
Pastora ne’e esklarese, protesaun no salvasaun ne’ebe jerasaun Jaco hetan maka wainhira Moisés lori sira sai hosi Rai Ejiptu sempre ses hosi Maromak Nia kastigu wainhira Maromak hatun ba Liurai Farao.
Exodu 12:21-22, hateten, Moisés bolu Israel nia lideransa sira hotu no dehan ba sira, Família Israel ida-idak tenki hili bibi-malae (domba) ida no oho hodi selebra loron Páskua. Depois imi tenki foti ai isope atu tau ba bibi nia raan nebee iha basia. No kose raan nee ba odamatan nia arus leten no arus sorin-sorin. Keta husik ema ida atu sai hosi ninia uma too dadeer-saan.
“Tempu ne’eba Maromak haruka Israel nia lideransa hotu uza ran bibi-malae (domba) hodi ses hosi kastigu ne’ebe Maromak atu hatun ba ema Ejiptu sira. Koalia ran, Nai Jesus mos uza ona nia Ran Santo hodi salva ita nia moris sai hosi sala no pekadu. Tamba ne’e, sei ita lakohi hetan kastigu, ita tenki besik nafatin ba Nai Jesus,” hateten Psa. Carolina.
Maromak, esplika pastora ne’e, Nia konese ema sira ne’ebe besik no metin ba nian, tamba ne’e nia sei proteje no salva iha ne’ebe deit no iha tempu susar mos nia sei proteje nafatin nia ema.
Salmu 91:14-15, Maromak hatete, “Tanba nia hadomi Hau, Hau sei salva nia, Tanba nia konhese Hau nia naran, Hau sei proteje nia. Bainhira nia bolu mai Hau, Hau sei hataan nia. Iha tempu susar, Hau sei hamutuk ho nia, Hau sei salva nia no foo onra ba nia.”
Maromak Nia Lia Fuan Santo ne’e, esplika Psa. Carolina atu hateten katak, signifikadu Gosen ida maka ema sira ne’ebe diak los no extra-ordinariu iha Maromak Nia Matan.
“Ema diak los no extra-ordinariu iha Maromak nia matan ne’e maka hanesan José ka jerasaun Jaco (Israel), hanesan apostolu 12 Jesus nian, ne’ebe iha sira nia moris espesial teb-tebes iha Maromak nia matan. Ita mos bele sai extra-ordinariu iha Maromak Nia Matan, wainhira ita iha fuan ne’ebe metin ba Maromak,” nia hateten.
Nia hatutan, “Hanesan gloma ne’ebe belit ho sasan ida, ema susar teb-tebes atu haketak, nune’e mos Maromak, wainhira ita metin ho Maromak, susar teb-tebes atu Maromak mos husik”.
Tamba ne’e pastora ne’e husu ba sarani Kristaun sira atu iha fuan metin ba Maromak, atu Maromak mos bele fo rai Gosen iha ida-idak nian moris, inklui nasaun Timor-Leste atu bele sai mos Gosen hosi Maromak