Programa Edukasaun, PR Horta Komitmentu Apoia Programa Ministeriu Edukasaun

DILI, www.news-viptv.com – Prezidente Repúblika (PR), José Ramos-Horta iha asuntu edukasaun nian iha TImor-Leste, xefi estadu kontinua fó nia apoiu ba Ministériu Edukasaun bainhira iha problema ruma no sempre disponível ba asuntu edukasaun iha Timor Leste.

Komitmentu ne’e, PR Horta afirma wainhira simu MInistra Edukasaun, Dulce de Jesus Soares, Sexta (25/8/2023), iha Palasiu Prezindesial.

“Mensagen husi Sua-Excelencia PR Jose Ramos Horta hateten katak, kontinua fo apoiu ba Ministeiru Edukasaun ba servisu no mos kontinua hakarak nakloke ba ami wainhira iha problema ruma iha edukasaun,” hateten Ministra Dulce ba jornalista sira hafoin hasoru malu ho PR Horta.

Iha hasoru malu ne’e, Ministra Edukasaun ne’e mos konvida xefi estadu atu partisipa iha programa Zoom Meeting ne’ebe sei halo entre estudante Ensinu Sekundáriu Katólika Nossa Senhora de Fátima Turiscai, Munisipiu Manufahi no eskola ida iha Sydney, Austrália ne’ebe foin lalais halo estajiariu iha eskola refere no haree katak presiza hasa’e kapasitasaun lian Ingles iha pratika.

Ministra edukasaun ne’e mos informa kona ba servisu hamutuk edukasaun ne’ebe ministeriu halo ho nia parseiru hodi hasa’e kualidade edukasaun, inklui kona ba rejime espesial ba profesora sira ne’ebe iha tempu badak sei implementa ba professor kontratadu kuaze rihun 4 resin ne’ebe mai hosi 2012-2013 to’o 2023.

“Agora iha presesu rekoila sira nia lista prezensa wanhira kompletu, Hau hanoin Ministeiru Edukasaun hanesan empregador ne’ebe mak fo’o kontratadu ba Professor sira iha obrigasaun tomak atu selu bazeia ba montante ne’ebe estupelado iha kontratu ne’e,” dehan Ministra Dulce.

Iha hasoru malu ho xefi estadu, Ministra Dulce mos informa katak MInisteriu Edukasaun ho Prezidensia Republika servisu hamutuk hodi realiza eventu Feira do Livro iha selebrasaun tinan-48 aniversáriu FALINTIL ne’ebé hala’o iha 20 Agostu, iha Aldeia Odelgomo, Suku Ai-Assa, Postu-Administrativu Bobonaro, Munisípiu Bobonaro.