Pdt. Angkie: Fiar Nain Kristaun Tenki Moris Haraik A’an

DILI, www.news-viptv.com – Nu’udar kriatura Maromak nian, fiar nain Kristaun labele moris halo a’an no gava a’an, maibe tenki haraik a’an.

Pastor Igreja IBTL Bethany, Pdt. Johanes Angkie iha pregasaun Kultu Domingu (14/4/2024) fo hanoin ba sarani sira labele senti a’an matenek liu, iha esperensia, iha kapasidade, iha talentu, iha pozisaun no poder hodi hare’e ema seluk mos la-vale iha sira nia moris.

“Labele hanoin hanesan ne’e, ita nia moris labele gava a’an, labele hatun ema, maibe ita tenki rekonese ita nia a’an, ita laiha buat ida, kuandu Nai Maromak tau buat sira ne’e, tau ita ba pozisaun, tau ita ba matenek, tau ita nia talenta, tau ita iha kapasidade hodi halo buat ruma ba Maromak Nia Gloria, sai bensaun ba ita nian jerasaun, ba komunidade no ba nasaun Timor-Leste,” hateten Pdt. Angkie.

Pastor esplika, apostolu Paulo antes simu Kristu, nia ema ne’ebe gava a’an tamba nia matenek, tamba nia relijiaun no hatene dutrina Torah, to’o ema seluk ne’ebe fiar Nai Jesus nia mos estraga no oho.

Maromak Nia Lia Fuan Santo iha Filipe 3:7-9, 7) Maibe buat sira nebe’e uluk hau hanoin iha folin, agora hau sura nudar folin laek tanba Kristu. 8) Nee duni, hau sura buat hotu nudar folin laek tanba folin boot liu mak atu konhese hau nia Nai Kristu Jesus. Tanba Nia mak hau lakon buat hotu no sura buat hotu nudar lixu deit, atu nunee hau bele manaan Kristu. 9) Hau hein katak Maromak hetan hau iha Kristu, laos tanba moris loos nebee hau nian hosi lei, maibee moris loos nebee mai liu hosi fiar iha Kristu. Ida nee mak moris loos hosi Maromak nebee depende ba fiar.

“Wainhira nia hasoru Nai Jesus, no moris foun, buat hotu kona ba nia moris pasadu nia senti hanesan lixu no laiha folin. Hanesan Apostolu Paulo, wainhira ita moris ona Fiar Jesus, Maromak lakohi ita hare fali ita nia hahalok iha pasadu, Maromak lakohi ita moris iha nakukun, Nai Jesus hakarak ita moris tuir nia planu, hanesan mos povu Israel ne’ebe Maromak lori sai hosi Ejiptu ba rai Kana’an, rai promesa ne’ebe nakonu ho Maromak nia Bensaun no Gloria, nune’e mos ita, Maromak hili ona ita atu moris tuir nia dalan hodi ita mos bele simu bensaun oi-oin hosi Nia,” hateten Pdt. Angkie.

Maromak Atan ne’e hateten, moris ne’ebe ohin loron ema hotu sei iha, ne’e tamba mai hosi Maromak.

“Nai Jesus ne’ebe iha ita nia laran, maka halo ita iha, halo ita moris. Labele gava an no foti aan kona ba saida deit, Ita bele moris to’o ohin loron, laos tamba ita nian a’an no ita nia forsa, maibe tamba Nai Jesus nia diak,” nia dehan.

Atu hatan ba Domin Nai Jesus nian, orasaun, hananu, hahii no adora ba Maromak importante teb-tebes atu Fiar Nai Jesus sira halo tuir, inklui ba iha Kultu Domingu.

“Ita moris ne’e tenki rekonese a’an katak ita moris laos tamba ita nia matenek, maibe tamba Maromak, tamba Jesus nia domin maka ita sei iha to’o ohin loron. Mai igreja mos tenki ho fuan, laos mai tamba relijiaun, laos tamba tradisaun, laos tamba bai-bain, ita mai Maromak Nia Uma, ita mai kultu tamba ita iha fuan ba Nai Jesus,” pastor ne’e esplika.

Wainhira Fiar Nai Jesus sira ba ho fuan tamba Jesus, sarani sira sei senti Maromak nia prezensa iha adorasaun.

“Maromak sei hola prezensa iha ita nia adorasaun, tamba ita mai ho fuan ne’ebe nakonu ho Esperitu Santo. Ita oin seluk ho ema mundu sira, ita oin seluk ho ema bain-bain ne’ebe ba igreja tamba relijiaun, tamba tradisaun, ne’e sira se la sente Maromak nia prezensa, maibe wainhira ita hahii no adora Maromak ho esperito santo, ita sei senti duni Maromak nia prezensa,” hateten Pdt. Angkie.

Nia fo ezemplu, wainhira ema atu halakan lampu ida iha nia uma laran, nia persiza fiu hodi liga ba eletresidade, maka lampu ne’e bele lakan. Hanesan Maromak, Fiar Nai Jesus sira persiza mos Esperito Santo hodi halo koneksaun ba Maromak.

Tamba ne’e, ba sarani sira, liliu jovem Kristaun sira atu moris ne’e mos tenki obedese ba Maromak, labele husik a’an monu ba hahalok mundu nian.

“Sarani sira, liliu Jovem sira se ita moris laiha Maromak, laiha Jesus, ita laiha buat ida, maski ita iha buat mundu nian oioin, ita iha osan, ita iha motor no kareta barak, ita iha uma diak, tamba buat hotu ne’e wainhira ita laiha mundu ona, ita sei la lori ita nia sasan no riku soi. Tamba ne’e wainhira ita sei moris, respeita nafatin inan-aman sira, rona sira nia lian, atu nune’e ita nia moris mos bele iha vida naruk no simu bensaun,” hateten Pdt. Angkie.