ME sei Taka Eskola Paralelu la Priense Kriteria ME

DILI, www.news-viptv.com  – Ministeriu Edukasaun (SE) sei taka eskola paralelu balun wainhira hetan la priense kriteria.

Ministra Edukasaun, Dulce de Jesus Soares informa ME dadauk ne’e halo hela identifikasaun ba eskola paralelu sira iha Timor-Leste tomak, no wainhira hetan balun ne’ebe la rejista iha ME, governu sei taka.

“Ministério Edukasaun agora halao hela identifikasaun ba eskola sira, tamba eskola balun hamosu tan paralelu no eskola paralelu sira ses husi kontrola ka la rezistu iha Ministeriu Edukasaun no sira haruka malu hanorin iha ne’eba depois Ministeriu Edukasaun mak simu fali problema nee. Tamba ne’e, ami halo verifikasaun ba eskola paralelu sira ne’e merese atu loke duni kalae,” hateten Dulce Soares ba jornalista sira, Tersa (9/1/2024), iha edifisiu Ministeriu Edukasaun, Villa Verde, Dili.

Nia fo ezemplu, iha eskola paralelu ida ho professor hamutuk 11 hodi hanorin estudante nain 20 deit.

Nia mos esklarese, ME laiha ona ligasaun ho professor kontratadu sira ne’ebe termina ona sira nia kontratu iha 30 dezembro 2023.

“Professor kontratadu 2023 nian kontratu hotu ona iha 30 dezembro 2023, tamba ne’e legalmente sira laiha ona ligasaun legal ida ho Ministerio Edukasaun. Sira atu kontinua ka la kontinua nee sira nia direitu No nia hakarak ba hanorin fali iha Eskola privado seluk nee desizaun ema ida idak nian,” dehan ministra ne’e.

Maibe nia esplika, professor sira ne’ebe termina ona kontratu ho ME, wainhira ME ho Komisaun Funsaun Publiku loke vagas, sira bele tuir rekrutamentu refere.