ME Sei Kontinua Programa Pro-Português ba Professor Sira

DILI, www.news-viptv.com – Ministeriu Edukasaun (ME) sei kontinua programa formasaun profesór/a liu-liu iha Língua Portugueza liuhusi programa Pro-Portugues ne’ebé halo kooperasaun ho Governu Portugues.

Ministra Edukasaun Dulce de Jesus Soares informa assuntu ne’e ba jornalista sira hafoin hasoru malu ho Vise-Primeiru Ministru, Ministru Koordenadór Asuntu Sosiais no Ministru Denvolvimentu Rurál no Habilitasaun Komunitária Eng. Mariano ASSANAMI Sabino hodi atualiza servisu ne’ebé mak ME halo iha Janeiru to’o Fevreiru.

“Ita kontinua monitorizasaun ba prosesu aprendizagem iha eskola sira kontinua ho programa ba professores sira liu-liu ba professor língua portuguesa sira liu hosi programa Pro-Português, koperasaun ho Governu Português no mos publika uitoan konaba apoio ne’ebe mak Ministeriu Edukasaun hetan husi doador sira hanesan Banko Mundial, Governo Australiano, iha mos servisu balun Ministeriu Edukasaun halo iha parte programa prontidaun eskola iha mos diskusaun ba asuntu seluk,” dehan Ministra Dulce Soares, Tersa (20/2/2024), iha Palacio do Governo, Dili.

Ministra ne’e mos esplika katak governu rekonese ME infrenta hela situasaun ba infraestrutura edukasaun ne’ebe sei falta sala de aula, maibe kestaun ne’e governu iha ona komitmentu liu hosi orsamenutu ne’ebe aloka bele ona rezolve balun.

“Iha mos problema ho professores sira hotu. Tamba ne’e, ita kontinua fo formasaun professores hodi hasae kualidade edukasaun, tamba hanesan ita bo’ot sira hatene iha Timor Leste assesu la dun sai problema maibe oinsa mak Ministeriu Edukasaun servisu hamutuk ho ministeriu sira seluk no komunidade edukativa tomak atu garantia katak vizaun bo’ot iha Timor-Leste nian atu Timor-Leste nia oan sira bele assesu ba edukasaun ne’ebe kualidade  ne’e mak sai papel importante iha Ministériu Edukasaun,” dehan governante ne’e.

Kona ba professor, ME iha tempu badak sei halo teste ba professor sira no mos iha semana oin sei hahu liu husi despacho ministerial ida atu responde ba professor sira tuir kuadro pesoal.

“Sei halo mudansa ka transferensia ba professor sira husi sskola ne’ebe mak menus, professor sira Ministeriu Edukasaun kontinua tau prioridade no responde ba buat ki’ik-oan Sira hanesan ne’e,” dehan Ministra Dulce.