Dada Investor no Hametin Relasaun, PR Ramos-Horta Vizita India

Dili, www.news-viptv.com – Prezidente Repúblika (PR), Jose Ramos-Horta ohin Segunda dadersan (8/1/2024) husik ona Timor-Leste hodi halo vizita servisu ida ba Repúblika Índia hodi hametin relasaun entre nasaun rua no oinsa dada investor mai Timor-Leste.  

Objetivu prinsipal vizita India ne’e rasik maka hodi partisipa iha Simeira Vibrant Gujarat ba da-10 2024 ne’ebé sei hala’o husi 10 to’o 12 Janeiru.

Sorumutu Globál Vibrant Gujarat, ne’ebé konseptualiza iha tinan 2003 iha lideransa vizionáriu husi Sri Narendra Modi, Primeiru-Ministru Índia, evolve ona iha nivel globál ba rede emprezariál, fahe koñesimentu no parseria estratéjika sira ba kresimentu inkluzivu no dezenvolvimentu sustentavel.

Durante loron rua nia laran, PRRamos-Horta sei ko’alia iha abertura Simeira ne’e hodi ko’alia kona-ba oportunidade negósiu sira iha Timor-Leste no promove relasaun bilaterál entre Timor-Leste no Índia.

“Hau hato’o ha’u-nia agradese bo’ot ba konvite atu aprezenta oportunidade Investimentu iha Timor-Leste iha forum internasionál prestijiozu ida-ne’e. Ami kompromete atu kria ambiente emprezariál ida-ne’ebé favoravel, ho lejislasaun tuir prátika internasionál ne’ebé di’ak liu, atu proteje no garante investimentu estranjeiru no parseria kooperasaun ka dezenvolvimentu,” hateten PR Ramos-Horta iha komunikadu imprensa ne’ebe publika ohin.

Nia hatutan, “Ita-nia diaspora ne’ebé vibrante kontribui maka’as ba dezenvolvimentu nasaun sira ne’ebé sai uma-na’in no Timor-Leste, ho remisaun estranjeiru sai hanesan fonte importante ida ba finansiamentu ba ita-nia ekonomia”.

Iha komunikadu ne’e Xefi Estadu hateten, Timor-Leste, nasaun ida-ne’ebé pasífiku no di’ak, konvida vizitante sira, emprezáriu sira no investidór sira atu esplora oportunidade foun sira. Hein katak sorumutu ida-ne’e sei kontinua nafatin hanesan katalizador ida hodi promove parseria ne’ebé fó rezultadu di’ak no kontribui ba dezenvolvimentu sustentavel global.

Primeiru-Ministru Repúblika Índia sei inaugura Simeira Globál Vibrante nian ba da-10 iha 10 Janeiru. Prezidente Republika Timor-Leste, Prezidente Emiradus Arabes Unidus no Prezidente Mosambiki sai nu’udar Xefe Estadu iha Simeira tinan ida-ne’e nian. Edisaun da-10 ne’e mós sei selebra tinan 20 husi Vibrant Gujarat nu’udar sorumutuk internasionál ida-ne’ebé susesu iha Azia.

Prezidente Ramos-Horta mós sei hala’o sorumutu bilaterál ho Primeiru-Ministru Índia. Repúblika Índia no Timor-Leste ativamente envolve iha setór oin-oin dezde estabelese relasaun diplomátika entre Timor-Leste no Índia iha 24 Janeiru 2003.

Durante sorumutuk ASEAN-Índia nian iha Simeira ASEAN ba da- 43 iha Setembru 2023 iha Jakarta, Primeiru-Ministru, Sri Narendra Modi anunsia ona desizaun atu estabelese misaun permanente ida iha Timor-Leste, hodi reforsa kompromisu Índia nian ba relasaun diplomátika ho Timor-Leste.

Prezidente Timor-Leste akompaña husi Ministru Negosius Estranjeirus no Kooperasaun, Bendito Freitas no ofisiál seniór sira husi MNEK.