Estudante Ensinu Superior sira iha Timor-Leste hakerek kona-ba Dame no Natureza iha Loron ba Rai

DILI, www.news-viptv.com – Estudante ensinu superior iha Timor-Leste hakerek kona-ba dame no natureza iha Loron ba Rai iha eventu ne’ebe realiza husi HWPL desde 18 Marsu 2024.

Iha karta komunikadu imprensa ne’ebe redasaun simu husi HWPL epslika katak estudante ensinu superior sira ne’e husi Universidade da Paz (UNPAZ) no universidade sira ne’ebé sira parseria ho MOU, Institutu Superior Cristo (ISC) no Institutu Universidade Naroman Esperansa (IUNE).

“Bainhira poluisaun ambientál sai todan liután, HWPL, rekoñese asuntu ne’e no ho objetivu atu rezolve problema ne’e, deside atu hala’o eventu hakerek iha selebrasaun Loron ba Rai. Sira organiza eventu hakerek ne’e atu hamutuk ho Loron ba Rai, hodi parseria ho profesór sira husi universidade ida-idak ne’ebé hanorin edukasaun dame. Eventu ne’e foka liu ba tema “natura” husi konteúdu prinsipál edukasaun dame nian volume 1-4,” hakerek komunikadu ne’e.

Liu husi eventu ida-ne’e, HWPL nia objetivu seluk mak atu hasa’e konsiénsia kona-ba gravidade husi poluisaun ambientál, hatudu liu tan natureza furak no importánsia husi konservasaun ambientál, no promove komprensaun kle’an kona-ba valór sira husi protesaun ambientál no dame liuhusi enkoraja estudante universidade sira atu partisipa hakerek kona-ba tema edukasaun dame nian hodi komemora Loron ba Rai.

“Eventu hakerek dame ne’e sai hanesan oportunidade ida atu rekoñese no promove esforsu sira husi PNL ba ambiente no pás globál no mós papél organizasaun ONG internasionál sira-nian,” Komunikadu ne’e hakerek.

Tuir HWPL, eventu ida-ne’e kontribui maka’as ba instilla importánsia ambiente no dame entre foin-sa’e sira iha Timor-Leste, ne’ebé sei lidera futuru nasaun nian, no mós ajuda hasa’e sira-nia sentidu responsabilidade. Liu husi sira-nia partisipasaun iha eventu hakerek ne’ebé dedika ba ambiente no dame, estudante universidade sira iha Timor-Leste hato’o ona sira-nia kompromisu atu hanoin kona-ba natureza no dame, no haka’as an atu hetan pás sustentavel hamutuk ho rai.

Hanesan estudante sira hasa’e ona sira-nia responsabilidade ba natureza no ambiente no sira-nia partisipasaun no komprensaun ativu ba dame no armonia liuhusi eventu ida-ne’e, HWPL mós planu atu kolabora no konsulta ho parte interesada sira iha komunidade Timor-Leste hodi servisu ba pás sustentavel iha Timor-Leste.