Edukasaun História importante ba Edukasaun iha Timor Leste

DILI, www.news-viptv.com  – Hodi hametin liu tan redi manorin iha materia historia ne’ebe estabelese on aba edukasaun dame iha Timor-Leste, Centro Nacional Chega!I.P (CNC, I.P) konsidera edukasaun historia importante ba edukasaun iha Timor-Leste.

Tamba ne’e, hodi haforte edukasaun historia iha Timor-Leste, CNC parseria ho United Nations Educational, Scientific and Cultural Organization (UNESCO), Ministériu Edukasaun (ME) no Instituto Nacional de Formação de Docentes e Profissionais da Educação de Timor-Leste (INFORDEPE) organiza workshop konsultivu ho dirijente eskola sira kona-ba operasionalizasaun rede estudu Profesór Istória nian iha Timor-Leste.

“Esperansa ita nian maka liu husi manorin sira bele iha formasaun ida bele ba ita nia estudante sira konabá identidade depois de tinan 20 ba ukun rasik an, no agora tempu ida ne’ebé mak importante ba manorin sira atu introduz didiak historia ba ita nia jerasaun foun sira nune’e sira bele iha identidade rasik nu’udar Timor Oan liliu iha mundu ida agora ne’ebé maka globalizadu la halimar,” dehan Diretor Executivo CNC, Hugo Maria Fernandes ba jornalista sira iha Hotel Timor, Kinta (22/8/2024).

Iha fatin hanesan Diretór jeral Edukasaun Pre-Eskolar, Ensinu baziko no Ensinu Rekorente Apolinário Serpa Rosa esplika, kooperasaun entre CNC, UNESCO no Edukasaun kleur ona servisu lao diak tebes no ohin haforsa liu tan edukasaun história ho profesores sira.

“Durante ne’e instituisaun 3 ne’e halo ona kapasitasaun ba ita nia mestri sira ne’ebé mak hanorin historia iha eskola sira hahu husi ensinu básiku, terseiru siklu to sekundáriu. Tantu  formasaun laiha deste tinan ida ne’e liu ba to ohin loron ita haforsa liu tan husi ita nia presente eskola nian ne’ebé mak ita konvida mai hodi halo prefisaun ba ita nia mestri sira ne’ebé maka mestri ba disiplina historia nian iha eskola,” hateten Apolinário.

Workshop ne’e rasik prezensa husi adjuntu diretor eskolar ho professores sira ne’ebé mak iha esperiensia kleur tona hanorin materia ba pre historia nian iha ensinu básiku no sekundariu.