Ahi Han Uma Hamate Ema 2

DILI, www.news-viptv.com – Sidadaun nain rua (2), ida (1) husi Bobonaro no ida (1) husi RAEOA relata mate tamba ahi han uma sira nian.

Vitima mate nain 2 ne’e relata husi Autoridade Protesaun Sivil (APC) iha atualizasaun dadus dezastre naturais ne’ebe akontese durante semana rua hahu 24 Marsu to’o 7 Abril 2025.

Xefi Seksaun Komunikasaun GREC-APC, Nelson Nunes Orleans iha konferensia imprensa, Segunda (7/4/2025) informa katak durante periodu 24 to’o 31 Marsu 2025, CNOPC- APC rejistu, uma 46 iha RAEOA hetan impaktu husi dezastre naturais be’e sa’e (inundasaun), inklui ema ida mate no ida kanek husi uma rua ne’ebe ahi-han. Nafatin iha RAEOA relata mos uma 2 hetan estragus tamba anin sobu sira nia uma.

Iha periode ne’e mos, relata uma ida estragus tamba ahi han iha Baucau, Bobonaro, no uma 2 iha Liquisa no 1 iha Viqueque aat tamba anin sobu sira nia uma.

“Ba rejiaun sira ne’e hotu hakarak hatete ba ita bo’ot sira hotu katak, Autoridade Protesaun Sivil halo kedas pakote emerjensia ba vitima sira durante dezastre ne’ebe akontese,” dehan Nelson Orleans.

Ba periodu 31 Marsu to’o 7 Abril 2025, CNOPC-APC mos rejistu kazu dezastre hamutuk mak hanesan Anin Bo’ot estraga uma 5, Ahi han uma 5, Be’e Sa’e estraga uma 9, prienxe kriteria uma 5, apoiu deit emerjensia ba uma kain 8, numeru ema sfetadus hamutuk 105, ema evakua hamutuk 32.

Dezastre ne’ebe akontese ho nia klasifikasaun husi munisipiu Baucau anin sobu uma 1, Bobonaro anin sobu Uma 1, ahi han uma 1 no mate 1. Lautem ahi han uma 2, Likisa anin sobu uma 1 no ahi han uma 1, RAEOA anin sobu uma 1 no be’e sa’e uma 9, Viqueque anin sobu 1 no ahi han uma 1.