Timor-Leste Garante Liberdade Imprensa ba Kna’ar Jornalista

BALIBO, www.news-viptv.com – Vise Ministru Assuntu Parlamentar, Aderito Hugo husu ba jornalista sira atu halao nia kna’ar tuir nia papel tamba estadu Timor-Leste garante ba Liberdade imprensa.

Iha programa Meet the Press ne’ebe realiza husi Sekretaria estadu Komunikasaun Sosial (SEKOMS) ba komemorasaun tinan 50 Trajedia Balibo 5 no selebrasaun loron nasional ba Liberdade imprensa, membru governu ne’e afirma, Liberdade imprensa ba servisu jornalista konsagra ona iha Konstituisaun RDTL desde asembleia konstituante.

Tamba ne’e nia husu ba jornalista sira atu labele tauk no hakfodak ba rejime saida deit maki ha Timor-Leste.

“Konstituisaun garante ho di’ak teb-tebes, kualker inisiativa se-se de’it, para transforma rai ida-ne’e, laiha fatin ezisti rai ida ne’e,” dehan Aderito Hugo, Tersa (14/10/2025), iha Balibo, Munisipiu Bobonaro.

Trajedia Balibo 5 hanesan istoria ida ne’ebe jornalista Australianu nain 5 sakrifika nia an hodi fo sai informasaun ba situasaun Timor-Leste iha tinan 1975 ne’ebe ikus selu ho sira nia vida.

Iha fatin hanesan Provedor Direitus Humanus e Justisa, Virgilio Guterres hateten rekomendasaun trajedia Balibo husi sasin sira maka husu atu iha Liberdade imprensa ba servisu jornalista sira.

“Hau hanoin depois de restaura, ita estabelese mos komisaun simu malu no rekonsiliasaun ninian, ha’u hanoin sei iha prosesu audensia iha CAVR ninian ne’e, iha sasin balu ne’ebe koalia kona ba trajedia Balibo ninian, husi trajedia Balibo ninian sai mos baze ba rekomendasaun ba iha relatoriu Chega ninian ne’ebe koalia katak, Timor-Leste iha nia estadu, bainhira ukun an, tenki iha elisaun ne’ebe garante liberdade imprensa garante independénsia ba meius komunikasaun sosial ninian,” nia dehan.

Nia informa, Jornalismu ne’e husi parte itegradu husi luta, povu timor nian ba independénsia,  labele haketak, tamba ne’e mak, se la rekonese jornalista  mos, pelumenus rekoñese netik katak jornalismu ne’e parte integradu.

“Se sira nain lima la mai, ita kala sei ukun an nafatin, maibé destinu ne’e la determina hanesan agora dadauk,” nia hateten.

Tenki senti orgullu servisu iha jornalismu, laos ita foin halo maibé ita nia ema sira uluk halo iha ne’e, la’os deit ho kosar been maibe ho fakar ran. Entaun ita tenki servisu ho orgulu, dignidade respeita kode etika atu nune labele halo atake pesoal ba ema seluk nia privasidade.

“Fo hanoin katak jornalista bele mate, maibe ideal sira labele mate, maibe ha’u laos dehan jornalista sira se peitu ba kilat musan, ne’e ha’u la enkoraja, hau sempre hateten katak ita nia isin ne’e vale liu jornal, labele ona halai duke se an ba,” dehan Virgilio Guterres.