Mahendra Singh Patiyal Embaixador India ba Timor-Leste

DILI, www.news-viptv.com – Prezidente no Laureadu Nobel ba Pás J. Ramos-Horta ohin (Kuarta, 12/4/2026) ofisialmente simu Karta Kredénsia husi Mahendra Singh Patiyal, Embaixadór Estraordináriu no Plenipotensiáriu Repúblika Índia nian ba Repúblika Demokrátika Timor-Leste.

Serimónia ofisiál ne’e hala’o iha Palásiu Prezidensiál Nicolau Lobato, Kuarta (22/4/2026.

Embaixadór Mahendra Singh Patiyal lori esperiénsia diplomátika liu dékada tolu ba ninia papél foun, ho kargu oioin ne’ebé mak nia asumi ona iha Ministériu Negósiu Estranjeiru Índia nian iha sede no iha rai-li’ur.

Ninia destakamentu sira iha rai-li’ur inklui knaar sira iha Embaixada sira Índia nian iha Sófia (Bulgária), Zagreb (Kroásia), no Manila (Filipinas). Foin lalais ne’e, nia hala’o knaar nu’udar Konselleiru iha Embaixada Índia nian iha Tunis, responsavel ba asuntu komersiál sira.

Nomeadu nu’udar Embaixadór rezidente daruak Índia nian ba Timor-Leste iha fulan Jullu tinan 2025, Sr. Patiyal nia esperiénsia ne’ebé kle’an subliña kompromisu Índia nian atu aprofunda envolvimentu bilaterál.

Hahú kedas husi estabelesimentu relasaun diplomátika liu husi asinatura Memorandu Entendimentu iha loron 24 Janeiru 2003, Timor-Leste no Índia harii no habelar ona parseria ne’ebé di’ak iha valór komun sira kona-ba demokrasia, pluralizmu, direitus umanus, no estadu direitu.

Kooperasaun bilaterál kontinua aprofunda ona iha setór defeza, edukasaun, saúde, agrikultura, no interkámbiu kulturál. Marku prinsipal sira inklui vizita istóriku husi Prezidente India nian, Droupadi Murmu mai Timor-Leste iha fulan Agostu tinan 2024, abertura resíproka ba embaixada rezidente sira iha Dili (Setembru 2024) no New Delhi (Outubru 2024), no asina akordu sira kona-ba izensaun vistu ba titular pasaporte diplomátiku no servisu nian, programa interkámbiu kulturál, no kooperasaun mídia entre RTTL no Prasar Bharati.

Nasaun rua ne’e agora serbisu hela atu estabelese mekanizmu Konsultasaun Gabinete Negósiu Estranjeiru nian hodi institusionaliza liután diálogu regulár kona-ba área prioridade sira.

Prezidente Ramos-Horta hato’o boas-vindas ho laran-kmanek ba Embaixador Patiyal no espresa konfiansa iha ninia abilidade atu hakle’an liután relasaun entre nasaun rua ne’e.

“Ohin marka pasu signifikativu ida iha amizade ne’ebé dura entre Timor-Leste no Índia. Aprezentasaun kredensiál husi Embaixadór Mahendra Singh Patiyal reafirma Índia nia kompromisu metin ba ita-nia nasaun nia dezenvolvimentu no estabilidade rejionál. Índia hamriik hamutuk ho ita durante ita-nia luta ba independénsia, no agora, bainhira ita hametin ita-nia kooperasaun bilateral iha defeza, edukasaun, no saúde, ita hein atu aprofunda parseria estratéjika ida-ne’e,” afirma Prezidente Ramos-Horta. “Prezidente Murmu nia vizita foin lalais ne’e no inagurasaun ba ita-nia embaixada rezidente ida-idak sai nu’udar testemuña ba ita-nia vizaun komun ba pás, prosperidade, no parseria ida-ne’ebé forte liu.”

Prezidente Ramos-Horta hato’o ninia konfiansa katak liu husi Embaixadór Mahendra Singh Patiyal nia mandatu, kooperasaun bilaterál entre nasaun rua sei aprofunda liután ba benefísiu povu nasaun rua nian.