Governu Aprova Rezulusaun Tristeza no Minutu Silensiu ba Falesimentu Ministru Jose Honório

DILI, www.news-viptv.com – Konsellu Ministrus aprova ona Rezolusaun Governu ida ne’ebé hato’o ninia tristeza boot ba Ministru Ensinu Superiór, Siénsia no Kultura, José Honório da Costa Pereira Jerónimo nia mate.

PM Xanana nia mensajem tristeza ba saudoso Jose Honorio.

Iha sorumutu Konsellu Ministru, Kuarta (22/4/2026), Governu hato’o sentida kondolénsia sinsera ba família enlutada no rekoñese públikamente kontribuisaun boot ne’ebé saudozu halo iha servisu ba Estadu no iha dezenvolvimentu ensinu superiór iha Timor-Leste.

Rezolusaun ne’e mós determina atu halo minutu silénsiu ida iha instituisaun públika sira no ensinu superiór hotu-hotu, iha data ne’ebé sei determina.

Sidadaun timoroan ho méritu rekoñesidu, destaka ninia dedikasaun públika tanba ninia kompromisu ba dezenvolvimentu sistema ensinu superiór, promosaun koñesimentu no valorizasaun kapitál umanu nasionál, tantu nu’udar membru Governu no molok ne’e iha Universidade Nacional Timor Lorosa’e.

Bainhira saudozu hala’o knaar governu nian, iha ninia servisu sempre bazeia ba padraun ne’ebé aas kona-ba dedikasaun, kompeténsia téknika no espíritu servisu públiku, no mós kontribui ona ba konsolidasaun polítika públika iha área ensinu superiór, siénsia no inovasaun.

Ninia vizaun estratéjika no kompromisu halo nia bele reforsa kualidade instituisaun ensinu superiór sira, promove kooperasaun akadémika internasionál, no mós habelar oportunidade formasaun avansada ba sidadaun timoroan sira.

Ninia mate nu’udar lakon ida ba Governu, ba komunidade akadémika no sientífika, no mós ba povu timoroan.

Saudoso Jose Honorio hakotu i’is hafoin hetan atakasaun fuan iha nia servisu fatin no konsege evakua ba HNGV maibe la salva.