Promove Feto Militar, F-FDTL Realiza Kompetisaun Diskursu

DILI, www.news-viptv.com – Atu prepara rekursu umanu no promove feto militar sira iha instituisaun F-FDTL, Gabinete Xefi Estadu Maior Jeneral F-FDTL kria atividade diskursu.

Tanente Jeneral Falur Rate Laek nudar xefi estadu maior jeneral F-FDTL esplika, atividade deskursu ne’e realiza hodi eleva no kapasita konesimentu no abilidade membru militar feto sira ne’ebe sei koloka iha Diresaun Igualidade Jeneru iha F-FDTL.

Hamutuk feto militar 51 ne’ebe partisipa iha konkursu diskursu ne’ebe realiza hosi Gabinete F-FDTL. Photo: Media F-FDTL

Hamutuk iha Feto Militar nain 51 ne’be partisipa iha kompetisaun diskursu refere. Kompetisaun ne’e rasik fahe ba kategoria tolu maka classe ofisial, sarjentu no prasa.

Xefé Igualidade Jeneru F-FDTL, Tenente Infantaria Marquita da Cunha hateten objetivu hosi atividade ida ne’e hanesan fas parte iha programa ne’ebé maka Governu tau ona hodi kontinua kapasita, motiva no eleva partisipasaun feto sira nian iha instituisaun Estadu, partikularmente iha Instituiaun F-FDTL.

Nia hatutan tan katak, atividade ne’e primeiru obriga sira hala’o survei itoan konaba topiku ne’ebé sira hili no enkoraja sira atu hambrik iha fatin públiku, hodi hat’o sira nian opiniaun nomós defende no profunda tan stetmentu ruma.

Manan nain sira mak hanesan kategoria ofisial; 1. Tenente Leandra Ferindra Gonzaga, 2. Alferes Maria Xavier, 3. Tenente Julia da Costa. Kategoria Sarjentu; 1. Segundu Sarjentu Antonieta da Silva, 2. Primeiru Sarjentu Armanda Freitas, 3. Segundu Sarjentu Silvina Ximenes, 4. Segundu Sarjentu Amena de Jesus. Kategoria Prasas; 1. Soldadu Izaura Freitas, 2. Kabu Angelina dos Reis, 3. Grumete Virgina da Costa, 4. Soldadu Natalia Soares dos Santos.