DILI, www.news-viptv.com – Ministeriu Edukasaun (ME) sei loke teste espesial ba eis professor kontratadu tinan 2023 ne’ebe la liu rekrutamentu.
“Teste espesial ne’e ita sei la aplika ba publiku katak ema hotu tuir. Teste espesial ne’e ba sira ne’ebe ohin iha ne’e (eis profesor kontratadu tinan 2023), opsaun Ministeriu Edukasaun nian mak ne’e,” hateten Sekretariu Estadu Ensinu Sekundaria Jeral no Tekniku Vokasional, Domingos Lopes Lemos ba jornalista sira, Kinta (16/1/2025), iha edifisiu ME Vila Verde, Dili.

Iha fatin hanesan Asesor Juridiku ME, Filipe Rodriguez informa katak, antes loke teste espesial, parte ME sei halo tan dialogu ho eis professor sira atu rona hanoin no rona politika opsaun ministeriu nian ba sulusiona eis profesores kontratadu sira.
“Rezultadu dialogu ba loron ohin nian, ministeriu pasa opsaun balu ne’ebe mak ministeriu hakarak hanoin atu solusiona problema ne’e. Maibe sei presiza tempu ituan ami atu halo dialogu, hare tok semana rua oin mai bele iha ona fatin no tempu atu ami ko’alia ba malu, atu nune’e bele rezolve problema ida ne’e,” dehan Filipe Rodriquez ba jornalista sira,
Agustino Pinto nu’udar porta-voz eis professor sira hateten, parte sira nia kontinua kestiona ba legalidade teste espesial wainhira halao ba sira.
“Ohin parte ME propoin proposta ida ba ami katak, sei loke teste espesial ba profesores kontratadu 2023. Maibe iha ami nia hanoin katak, problema ne’e laos partisipa iha teste ne’e, maibe legalidade husi teste ne’e rasik,” dehan Agustino.
Tamba ne’e, buat hotu-hotu bele halo no koalia, maibe labele hases husi lei ne’ebe hatur ona iha estatutu kada dosente no lei funsaun publika nian.
“Se lei rua ne’e fo dalan ona ami sei tuir, tamba ami lakoi sai tan vitima futuru oin mai. Se mak garanti ida ne’e, sei agora ami tuir hela deit dalan legal mai sai tia ona hanesa ne’e, se ida mak laiha tuir lei ne’e oinsa tan? Tamba ne’e mak ohin ami hare katak, teste espesial ne’e khusus deit ba ami, maibe mai nia problema laos partisipa teste ne’e,” nia hateten.
Tuir lei estatutu funsaun publika, ajenda admistrasaun funsaun publika ne’e dala ida atu ba ona funsionariu publiku ou permanente. Maibe tamba lei dekretu lei hatur ona katak, atu ba teste ne’e mak ingresu espesial ne’e.
“Ingresu espesial ne’e iha kriteriu balu tenki prense. Agora ami priense ona, entaun ministeriu edukasaun obriga ami nafatin partisipa teste. entaun ita tenki halo diskusaun lai ga? tamba lei garante ona ema ne’e atu ba funsionariu ona, tamba sa tenki teste? dalaruma publiku hanoin katak dalan diak liu mak ba teste deit, maibe se dekretu lei ne’e hateten katak hotu-hotu ha teste entaun ba teste, agora profesores kontratadu kuatru mill ba ona ingresu espesial , tamba sa ajentes um mill ne’e hela fali. Entaun iha kriteriu balu ne’ebe presija ita kompleta par viola ema nia direitu, tamba ne’e mak ami sei halo aproximasaun ho parte ministeriu Edukasaun nian,” nia hateten.
Total eis profesor kontratadu tinan 2023 hamutuk 1,499, ne’ebe hosi numeru ne’e nain 261 ho diploma sekundaria.