Inan-Aman Estudante ESGP Suai Selu Rasik Manorin Nain 16

SUAI, www.news-viptv.com – Inan-aman husi eskola Eskola Sekundariu Jerál Publiku Suai, Munisipiu Covalima tau osan hamutuk hodi selu manorin ne’ebe la sufsiente iha eskola refere.Situasaun ne’e relata husi Ajunta Diretora Eskola refere, Ana Doutel Sarmento Von ba Prezidenti Republika, Jose Ramos-Horta ne’ebe halo vizita ba eskola refere iha semana kotuk liu ba.

Ana esplika, ho manorin hamutuk 59 ne’ebe iha, numeru ne’e la sufsiente hodi hanorin estudante atual hamutuk 1,765.  Alende menus numeru manorin, eskola refere infrenta mos menus sala de aula no eskritoriu ba manorin sira, inklui laboratoriu pratika ba estudante sira.

Iha nia vizita, Prezidenti Jose Ramos Horta apela ba estudante sira atu kontinua badinas estuda tamba nudar jovem, estudante sira maka futuru nasaun nian. Durante vizita, xefi estadu mos fahe material desportu ba eskola refere.

Antes ne’e, xefi estadu durante halo vizita servisu iha Munisipiu Covalima, apoia mos osan dolares amerikanu rihun ida ba Uma Mahon Sentru Esperansa ba Feto Salele, iha Suku Maudemo, Postu Administrativu Tilomar.

Alende oferese osan, xefi estadu mos fahe material cozinha nian, makina suku ropa rua, no ropa ho sapatu ne’ebe oferese husi The Nippon Foundation.

SB: Direitora Sentru Esperansa ba Feto, Santina Imaculada de Oliveira