FDCH-CNC Loke Bolsu Estudu 1.129 ba Vulneravel Nia Oan

DILI, www.news-viptv.com –  Fundu de Dezemvolvimentu do Capital Humanos (FDCH) servisu hamutuk ho Centro Nasional Chega.I.P iha tinan 2024 sei fo bolsu estudu 1.129 ba vulneravel nia oan.

Bolsu estudu ne’ebe FDCH-CNC fo ne’e realiza ona liu hosi asina nota entendimento hodi foka liu ba área koperasaun atu atribui bolsa estudo ba sobrevivente vulnerável sira nia oan kontinua estudu hodi hakman ekonomia família nian. Nune’e, instituisaun rua ne’e kompostu husi CNC no FDCH asina nota entendimento ne’e banati ba enkudramentu juridika sira atribui ba instituisaun idak idak, hodi bele promove no implementasaun rekomendasaun sira husi relatório final Chega no PMAS li-liu iha aspeitu apoiu ba dezemvolvimentu kapital umanu Timor Leste nian.

Diretor FDCH, Júlio Aparício esplika, ba kategoria bolsu estudu ne’e sei foka liu iha area saude, enjineria no justisa.

“Ita iha instituisaun barak entaun ami hakarak servisu ho CNC.IP hodi halao servisu no ami sei rekruta estudante 1.129 kada tinan. Laos tinan ida rua liu tia mak halao fali lae. No tinan ida ne’e ami iha prioridade haat mak Saúde, Engenharia, Justiça. Maibe iha área justiça sei ba eskola iha Portugal no Brasil tamba Direito sira Presiza língua tenke diak,” dehan Júlio Aparício ba jornalista sira, Kuarta (6/3/2024), iha Balide Dili.

Ba prosesu selesaun nian, Diretor Executivu CNC, Hugo Maria Fernandes hateten, CNC maka sei responsabiliza ba rejista no verifikasaun dokumentu ne’ebe hatama hosi kandidatu bolseiro sira.

“Entendimento ida nee, ezije dever instituisaun ida idak nian, dever CNC nian mak rejista no verifika kandidatu bolseiro sira husi sobrevivente sira ne’ebe ho kondisaun vulnerável hodi submete ba FDCH, submete mos planu orsamento bolsu estudu ba iha FDCH hodi inklui orsamento jeral annual, halo mos monitorizasaun, avaliasaun no akompanamentu regularmente ba FDCH,” esplika Hugo Fernandes.

Nota entendimento ne’ebe instituisaun rua ne’e asina nia validade ba tinan 4, komesa husi loron asina nota entendimento no bele prolonga ninia durasaun ka bele renova ninia konteudu tuir nesesidade.