Tronton-Kontentor Halai Loron Sei Kona Multa

DILI, www.news-viptv.com – Polisia Nasional Timor-Leste (PNTL) liuhusi seksaun Trânsitu apela ba publiku katak tronton-kontentor ne’ebe nafatin halo sirkulasaun iha tempu loron, sei aplika multa baseia ba lei kondigu estrada.

Baseia ba despaixu konjunta ho númeru 1/9/2022 husi Ministru Interior no Ministeiru Transporte Komunikasaun hodi bandu kontentor sira la bele halo sirkulasaun iha tempu loron maibe halo movimentasaun hahu tuku 19.00 to’o 07.00.

“La kompri ona regras despaixu konjunta ne’e ita bele dehan kontra orden autoridade publiku iha ne’eba fiksa tiha ona, depois mak ami sei haree motorista sira ne’e nia karta kondusaun ne’e tuir duni kategoria kontentor ne’e ou lae tamba aplika multa ne’e baseia ba lei kondigu Estrada,” informa Xefe Transitu Seguransa Rodaviariu Superintendente Asistente, Luis da Costa ba jornalista sira Kuarta (24/1/2024), iha Kuartel Jeral PNTL, Kaikoli, Dili.

Nia mos esplika katak, razaun bandu tronton-kontentor sira labele movimentu iha loron hodi hamenus mos engarafamentu (kemacetan) ne’ebe rezulta hosi transporte refere.

“Fo sai nain ba kontentor hirak ne’e liuliu kompaña sira atu bele kompri tamba engrafamentu ne’e mos kontribui husi kontentor sira ho ida ne’e ami sei halo operasaun ba kontentor sira ne’ebe mak la iha autorizasaun halo sirkulasaun la tuir despaixu ami sei hapara buka fatin luan hodi para nune’e save ami sei foti mai iha polisia transitu hodi halo prosesu multa koimas,” nia hateten.