Laiha Orsamentu no Bolsuleiru Valor La Diak, FDCH Hapara Bolsa Hakbit ba Parsial

DILI, www.news-viptv.com  – Hare ba rezultadu estudu bolsuleiru sira ne’ebe lahatudu valor diak, Fundu de Dezemvolvimentu do Capital Humanos (FDCH) hapara ona bolsa hakbit ba parsial.

Diretor Ezekutivu FDCH, Júlio Aparício esplika, alende bolsuleiru sira lahatudu prestasaun diak ba valor akademiku nian, razaun seluk FDHC hapara bolsu hakbit ba parsial tamba orsamentu.

“Hapara tamba ne’e iha razaun fundamento katak ne’e depende hare ba orsamento. Tamba kuandu kompletu ne’e subsidu kustu de vida no profinas lao ne’e 4 milloes kada tinan maibe realidade ema la aproveita ida, la estuda, dados ne’ebe ami iha hanesan ohin ami dehan ida ne’ebe aproveitamento 75% ne’e mill ital deit. Mais barak liu ne’e la aproveita, balun mai ho valor 1.70 , 1.90 , 2,0  balun simu osan hanesan funsionariu depois ida ne’e mai atu halo saida? Tamba ne’e labele fo sala ba governo husu ba sira nia an rasik sira estuda kalae,” dehan Julio Aparicio ba jornalista sira, Kinta 4/7/2024), iha Salaun Delta Nova Delta, Dili.

Ho razaun hirak ne’e, FDCH realiza workshop konaba mapamento rekursu umanu setor publiku no privado iha Timor Leste ho linas miniteriais sira hotu hodi rona opiniaun ba halo mudansa ba bolsu estudu ba Timoroan sira iha periodu 2025 nian.

Júlio Aparício hateten, workshop ne’e hanesan estudu ida ba FDCH hodi avalia no rona opiniaun husi linas miniteriais sira hodi tau prioridade saida mak FDCH sei apoiu estudante sira iha nia estudu li-liu iha area espesifiku sira.

“Workshop ne’e FDCH nia planu, katak tinan ida ne’e ami atu halo mapamento ba rekursu umanu. Tamba ne’e ami konvida lina ministeriais sira hotu no mos representante husi munisipiu sira para mai hotu iha fatin ida ne’e, ami esplika kona-ba lalaok mapamento hanesan estudu ida FDCH halo estudu ida atu hatene kona-ba rekursu humanu no mos planeamento kada lina ministeriais no instituisaun sira hotu hodi nune’e ami bele hatene tamba FDCH durante ne’e fo formasaun no bolsu estudu entaun ami bele hatene iha instituisaun ida-idak ne’e saida maka sira presisa karik ami fo bolsu estudu ba area ida ne’ebe mak prioridade ba instituisaun sira hotu,” hateten Júlio Aparício.

Ministro Planeamento no Investimento Estratégiku nu’udar Prezidente Administrasaun FDCH, Gastão Francisco Sousa heteten iha dezenvolvimentu nasional, governo iha programa barak atu implementa, tamba ne’e dezenvolvimentu rekursu umanu mos prioridade id aba iha programa governu.

“Setor Infraestrutura agora atu implementa programa sira ne’e ita presiza ema, presiza  rekursu umanu. Se ita rekursu umanu iha, ita iha kapasidade atu implementa programa ne’e kalae tamba ne’e maka mapamento ne’e importante atu ita hatene didiak ita nia rekursu umanu iha idadak nia ministeriu ne’e, laos setor publiku deit, maibe abrange mos setor privado,” hateten Gastão Sousa.