Dili, www.news-viptv.com – Komisaun Reguladora Arte Marsias (KRAM) sei foti asaun no fo sansaun ba membru Grupu Arte Marsias (GAM) no Grupu Arte rituais (GAR) ne’ebe uza atributu organizasaun no publika iha Media Sosial (MedSos).
Asaun ne’e KRAM uza hodi hamenus konflitu no konfrontasaun entre membru GAM no GAR sira ne’ebe provoka malu uza MedSos.
“Se mak hatais lao ba mai polisia kaer kona ou autoridade halo keixa ami hatene nia kona multa US$ 5 to’o US$ 200. Nune’e mos halo publikasaun iha media sosial Facebook, WhatsApp ami hatene no ami buka nia naran iha baze de dadus nia mais husi ranting ida ne’ebe?, sentru ne’ebe?, no mai husi klube ida ne’ebe? nia sei hetan sansaun no sansaun mos ba nia treinador sira ne’ebe nia hola parte ba tinan ida ne’e sei implementa,” deklara Prezidente KRAM Octavio da Conceição ba jornalista sira iha Konferensia Imprensa Sexta (19/01/2024) iha edifisiu KRAM Lecidere, Dili.
Sansaun ba membru GAM ne’ebe publika nia fotografia uza atributu GAM nian, KRAM prepara ona liu hosi rezulusaun ida no pronto atu aprezenta iha Sorumutuk Konsellu Ministru liu hosi Ministru Juventude, Desportu, Arte no Kultura.
Rezolusaun ne’e, esplika Octavio, nu’udar orden estadu ou regra normativa ne’ebe ema hotu-hotu tenki halo tuir tamba ne’e membru GAM sira ne’ebe laiha disiplina hodi kontinua pratika no uza farda sub-subar viola ona lei numeru 5/2017.
Governu oras ne’e dadaun suspende pratika GAM liu hosi rezolusaun lei numeru 45/2023 no nia data deterrminasaun to’o Abril 2024.
“KRAM (komisaun Reguladora Arte Masias) nia posizaun mak ida ne’e depois de rezolusaun lei numeru 45/2023 wainhira remata iha 10 Abril, kuandu Governu reativa fila-fali pratika Arte Marsiais, KRAM sei foti sansaun ne’ebe regirozu ba membru organizaun hotu-hotu ne’ebe la kompri lei lei numeru 15/2017 no la kompri segundu diretiva KRAM ne’e sansaun sei todan tebes ba sira,” dehan prezidenti KRAM ne’e.
KRAM durante governu suspende atividade GAM, halo ona fikalizasaun hamutuk Polisia Nasional Timor-Lorosa’e (PNTL) konklui ona re-fiskalizasaun ba sentru treinamentu “ranting” Organizasaun Arte Marsiál (OAM) PSHT, IKS-PTL no KORK hamutuk sentru 993 iha munisípiu 11.
Re-fiskakizasaun ne’e bazeia ba rezolusaun governu numeru 45/2023, 10 novembru kona-ba suspensaun Atividade Pratika Arte Marsial iha Timor-Leste durante loron 90, hodi fo órden servisu bá KRAM no PNTL atu halo re-fiskalizasaun ba sentru, Eskola, no klube sira ne’ebé pratika atividade arte marsiais iha territoriu Timor laran tomak.
“Husi 1.042 ranting OAM, PSHT, IKS-PTL no KORK, 993 ranting mak ita kobre hotu ona enkuantu Dili ho RAEOA seidauk. Tuir orariu, 20 janeiru 2024 KRAM ho Komandu PNTL Munisipiu Dili husi Postu Administrativu Metinaro no Cristo Rei sei kontinua hala’o atividade re-fiskalizasaun ba “ranting” husi Organizasaun tolu iha kapital Dili no mos RAEOA, ho total sentru hamtuk 100 resin mak pratika arte marsiais,” dehan Prezidente KRAM, Octavio da Conceição ba media sira iha konferensia imprensa ne’ebé realiza iha sala reuniaun KRAM, Lecidere, Dili, sexta-feira ne’e.
Prezidente KRAM mos informa, bainhira konklui atividade re-fiskalizasaun iha territóriu nasional sei aprezenta relatoriu final ba Governu liu husi Ministru Juventude, Desportu Arte no Kultura (MJDAK), Nelyo Isaac Sarmento nomos Ministru Interior (MI), Francisco da Costa Guterres, hodi aprezenta iha sorumutu Konsellu Ministrus nian, hodi hetan apresiasaun no desizaun.
“Rezolusaun fó loron 90 ida-ne’e, ami sei entrega relatóriu fiskalizasaun iha 10 fevereiru 2024 ba Ministru nain-rua no sei aprezenta ba Konsellu Ministrus hodi hetan avaliasaun nomos iha desizaun ikus,” dehan Octavio da Conceição.
Prezidente KRAM esplika, rezolusaun numeru 45/2023, 10 novembru, ne’e nudar baze ba KRAM ho PNTL hare re-fiskaliza pontu importante sira hanesan; identifika se mak responsavel ba klube, sentru no eskola. Daruak, Se mak treinador ka se mak fo treinu ba ema iha fatin pratika. Datoluk, se mak hala’o treinamentu, atleta hira, feto hira no mane hira. Dahaat, se maka rai-nain, rai estadu ka rai eransa no rai ne’e aluga. Dalima, fatin treinamentu ne’e merese atu halo treinamentu ka lae. Iha hariis fatin ka lae, no rai nia luan ne’e hira. Fatin treinamentu ne’e asesu ba estrada ka lae. Fatin treinamentu ne’e nakloke ba ema hotu atu bele haree ka la’e ka subar de’it. Fatin treinamentu ne’e iha autorizasaun hosi autoridade lokál, hanesan xefe aldeia, xefe suku to’o OPS suku ka lae.
“Ida ne’e mak ita atu ba haree, Identifika prosedimentu administrativu hot-hotu, tuir segunda diretiva KRAM, ita tau ona iha ne’eba kritériu 18. Sira ne’ebé prienxe kriteriu, KRAM sei rekomenda ba governu liu-liu ba Ministru Juventude Desportu Arte no Kultura, no Ministru Interior, hodi aprezenta ba konsellu ministrus, hodi hetan apresiasaun, nomós iha desizaun ikus. Husi relatoriu ne’ebe KRAM sei aprezenta, sei hamosu rekomendasaun rua. Ida ne’ebé prienxe, Sufisiente, no Lae liu, no sei fo sai rezultadu iha fulan-marsu tinan ne’e ,” tenik Prezidente KRAM ne’e.
![banner 1000x250](https://news-viptv.com/wp-content/uploads/2024/03/BANER-KURSU-VIP.jpg" "banner 1000x250")
![banner 728x90](https://news-viptv.com/wp-content/uploads/2022/11/Efata-John-14-6.jpg" "banner 728x90")
![banner 1000x250](https://news-viptv.com/wp-content/uploads/2024/03/IKLAN-KURSU-VIP-24.jpg" "banner 1000x250")
