Konsidera Parseiru Konfiavel, Timor-Leste Sei Ratifika Akordu Kooperasaun ho Malazia iha Area Defeza

DILI, www.news-viptv.com – Rekoñese kna’ar Malázia nian nu’udar parseiru defeza konfiavel Timor-Leste nian dezde restaurasaun independénsia, Governu Timor-Leste sei ratifika Akordu Kooperasaun iha area defeza ho Governu Malázia.
Ratifika akordu ne’e hetan ona aseitasaun husi Konsellu Ministru iha Sorumutu Tersa (4/11/2025), ne’ebé aprezenta hosi Ministru Defeza, Donaciano do Rosário Gomes, Konsellu Ministrus delibera hodi ratifika Akordu Kooperasaun iha Área Defeza entre Governu Malázia no Governu Repúblika Demokrátika Timor-Leste.

Iha komunikadu imprensa ne’ebe redasaun assesu, entre objetivu prinsipál sira hosi Akordu ne’e maka hametin relasoins bilaterais iha área militár, liuliu liuhosi diálogu polítiku-estratéjiku regulár, fahe informasaun no esperiénsia sira, interkámbiu pesoál no formasaun téknika no mós militár, hala’o ezersísiu hamutuk no kooperasaun iha área siénsia, teknolojia no indústria defeza nian.

“Kompromisu hosi Governu rua ne’e hodi promove pás, seguransa no estabilidade rejionál iha ámbitu ASEAN, ne’ebé Timor-Leste agora sai membru plenu direitu,” hakerek komunikadu ne’e.

Kooperasaun area defeza entre nasaun rua ne’e mos haforte iha deklarasaun konjunta iha pontu numeru 13, wainhira PM Anwar Ibrahim mai vizita Timor-Leste iha 23-24 Setembru liu ba, ne’ebe pontu ne’e hateten, Malázia reafirma nia prontidaun atu kontinua apoia Forsa Defeza Timor-Leste liuhosi Programa Kooperasaun Defeza Malázia nian (MDCP), ho objetivu atu avansa kooperasaun defeza nian, tuir enkuadramentu Livru Mutin Defeza nian kona-ba Parseria Kredível sira. Líder rua hein atu asinatura MoU kona-ba Kooperasaun Defeza nian iha tempu badak, ne’ebé sei loke dalan ba kolaborasaun ne’ebé boot liu.

Kona-ba kooperasaun indústria defeza nian, Líder rua ne’e konkorda atu nasaun rua ne’e kontinua ativamente sira nia kompromisu sira iha Espozisaun no Konferénsia Ázia Servisu Defeza nian (DSA), no Espozisaun Marítima no Aeroespasiál Internasionál Langkawi nian (LIMA), tuir énfaze hosi Livru Mutin Defeza nian kona-ba haburas parseria estratéjiku industriál sira hodi hasa’e kapasidade no reziliénsia mútua.