DILI, www.news-viptv.com – Governu liu husi sorumutu Konsellu Ministru, Kuarta (11/2/2026) aprova projetu Rezolusaun Governu, ne’ebé aprezenta hosi Ministru Interiór, Francisco da Costa Guterres, kona-ba suspensaun temporária no revizaun ba Konkursu Públiku Admisaun iha Kursu Formasaun ba Ajentes Polísia Nasionál Timor-Leste (PNTL).
Ho desizaun ida-ne’e, Governu hakarak asegura transparénsia, legalidade, no kredibilidade iha prosesu rekrutamentu, hodi konsidera dúvida no preokupasaun sira ne’ebé hato’o hosi kandidatu sira no entidade oioin kona-ba kumprimentu ba rekizitu balun no regularidade iha faze konkursu nian. Ba ida-ne’e, Rezolusaun Governu prevee suspensaun temporária ba konkursu no reforsa mekanizmu supervizaun no fiskalizasaun.
“Desizaun ne’e mós determina atu halo reestruturasaun ba Komisaun Monitorizasaun no Fiskalizasaun nian, liuhusi integra membru nasionál no internasionál independente sira, nune’e mós halo revizaun klean ba faze hotu-hotu hosi prosesu selesaun nian, ho nia objetivu atu hatene loloos faktus no potensialmente adota medidas koretivas,” sira komunikadu imprensa ne’ebe publika iha Portal Governu.
Ho prosedimentu ida ne’e, Governu iha intensaun atu hametin sidadaun sira-nia konfiansa iha instituisoins públikas no atu garante katak asesu ba Polísia Nasionál Timor-Leste ne’e hala’o ho justu, imparsiál, no tuir lei.
Tinan 2026, PNTL loke vagas ba membru agentes 400 ne’ebe iha prosesu selesaun hamosu irregularidade no lamentasaun husi aplikantes sira ne’ebe konsidera prosesu selesaun nakonu ho diskriminasaun no nepotisme tamba polisia nia oan sira barak maka liu, duke povu bain-bain sira.
Aplikante sira mos hato’o ona sira nia lamentasaun ba Primeiru Ministru Xanana Gusmão no levanta iha plenaria Parlamentu Nasional hodi husu ba governu hare hikas prosesu selesaun atu nune’e povu nia oan hot-hotu iha direitu atu servisu mos nu’udar membru polisia.
Konsellu Ministru ne’e aprova mós projetu Dekretu-Lei, ne’ebé aprezenta hosi Primeiru-Ministru, Kay Rala Xanana Gusmão, no Ministru Prezidénsia Konsellu Ministrus Agio Pereira kona-ba Rejime Karreira Espesiál ba Bombeirus Profisionál Timor-Leste.
Ho diploma ida-ne’e, Governu hakarak estabelese estatutu espesífiku ba bombeirus profisionál iha Timor-Leste, hodi rekoñese natureza úniku hosi sira-nia funsaun nu’udar ajentes espesializadu ba protesaun sivíl no importánsia hosi sira-nia papél iha protesaun ba vida umana, no beins nune’e mós hodi responde ba situasaun emerjénsia, asidente, no dezastres iha teritóriu nasionál tomak.
Rejime ne’ebé propoin ho ninia objetivu atu define karreira bombeirus profisionál hanesan karreira espesiál iha funsaun públika, estabelese ninia estrutura ierárkika, kategoria no pozisaun sira, no mós regras ba rekrutamentu, formasaun, progresaun no promosaun. Ho inisiativa ida-ne’e, Governu buka atu valoriza no dignifika karreira ne’e, asegura estabilidade ne’ebé boot liu no enkuadramentu profisionál, no reforsa kapasidade atu responde ba sistema nasionál protesaun sivíl.
Antes ne’e liu husi publikasaun pajina PNTL, Ekipa Komisaun Rekrutamentu Ajente Polisia Nasional Timor Leste (PNTL) liu husi Porta Voz Superintendente Polísia António da Luz iha Konferensia Imprensa Segunda-feira (09/02) ne’e informa tuir Kalendariu katak aban loron 10 fulan Fevereiru sei hala’o Teste Médiku ba Kandidatu Ajente PNTL foun ne’ebe aprovadu, sei adia tanba Ekipamentus Reagente iha Laboratorium Nasional seidauk iha.
