banner 1000x250

Indonesia-Australia no ASEAN Tenki Sai Topu Ajenda Nasional

  • Share
PR Horta wainhira hasoru malu ho Mahfud MD, enviadu espesial Prezidenti Indonesia, Joko Widodo. Photo: Ego Pereira
banner 728x90

DILI, www.news-viptv.com – Prezidenti Republika (PR), Dr. Jose Ramos Horta deklara iha relasaun externa, Indonesia, Australia, Nova Zelandia no ASEAN sei sai topu ajenda nasional iha nia mandatu.

“Ha’u sempre defende no sei kontinua atu defende katak ita-nia relasaun ho Repúblika Indonézia, Austrália, Nova Zelándia no rai sira hosi Sudeste Aziátiku jeografikamente besik liu Timor-Leste, tenke iha topu ba ita-nia ajenda nasionál,” dehan PR Horta, Sexta (20/5/2022), iha Tasi Tolu, Dili.

banner 1000x250

Timor-Leste, esplika PR Horta, tenke esplora forma sira ne’ebé efikás ba integrasaun ekonómika no komersiál ne’ebé boot liután, kooperasaun boot liután iha área sira Defeza no Seguransa nian, dezignadamente seguransa marítima.

Alende ne’e, tenke insentiva kooperasaun sub-rejionál ho provínsia indonézia orientál sira, partikularmente Nusa Tenggara Timur, no ho Territóriu Norte  Austrália no Oeste Australianu, liuliu, iha promosaun ba dezenvolvimentu komérsiu nian no mobilidade ema no produtu sira liuhosi konektividade marítima no aérea.

ASEAN, hahú hosi ninia konstrusaun, iha tinan 1967, sai nu’udar pilár fundamentál ida ba prosperiedade no estabilidade iha ita nia rejiaun, nune´e mós sai nu’udar modelu susesu ida husi organizasaun multilaterál sira iha órden internasionál.

Adezaun Timor Leste nian ba ASEAN sai nu’udar objetivu estratéjiku nasionál ne´ebé ha’u rasik defende, hahú kedas iha tinan 1974, durante enkontru istóriku ida iha Jakarta, hamutuk ho Ministru Negósiu Estranjeiru, Adam Malik.

“Ha’u agradese ba ADB no EU, ba Sekretariadu no ba País Membru sira ASEAN nian, ba apoiu tomak ne’ebé sira fó iha ámbitu prosesu preparasaun adezaun nian. Ha’u felisita mós ekipa koordenadora timoroan nian ne’ebé hatudu tiha ona kompeténsia no dedikasaun aas.

“Ha’u saúda lideransa sira hosi ASEAN iha esforsu ba diálogu no mediasaun hodi hakotu violénsia estrema hasoru povu Myanmar nian,” xefi estadu esplika.

Iha nia politika externa, PR Horta mos agradese ba Japaun ne’ebe sai tiha ona nu’udar parseiru jenerozu ida ba Timor-Leste. “Ita agradese ba apoiu hosi Japaun, partikularmente iha setór infraestrutura no iha konstrusaun ba terminál aérea foun iha  aeroportu Dili. Durante dékada barak nia laran Japaun sai tiha ona nu’udar pilár importante ida iha multilateralizmu ho ninia apoiu diplomátiku no finanséiru ba ajénsia espesializada, programa no fundu sira ONU nian.”

Timor-Leste no Repúblika Koreia iha esperiénsia istórika ida ne’ebé idéntika tebes no povu ho governu Koreanu sai tiha parseiru ne’ebé iha fuan-boot ba ita nia rain. Fó oportunidade ba merkadu servisu hosi Repúblika Koreia ba ita-nia traballadór timoroan ne’e hetan apresiasaun ho kle’an, no rejistu ho satisfasaun ba akollamentu profundamente pozitivu ne’ebé sosiedade koreana fornese ba traballadór timoroan sira. Ha’u hein katak númeru traballadór timoroan sira sei aumenta signifikativamente.

Ha’u afirma iha ne’e, ita-nia solidariedade tomak ho Repúblika Koreia relasiona ho situasaun inseguransa no tensaun iha Península Koreana no ita konkorda ho inisiativa sira tomak liuhosi diálogu hodi halakon tensaun sira iha rejiaun ne’ebá.

Nu’udar poténsia globál, membru permanente Konsellu Seguransa ONU nian, Repúblika Populár Xina iha responsabilidade boot iha promosaun no defeza ba diálogu atu prevene pás rejionál no globál. Pás só bele sai reál no dura iha tempu naruk wainhira hetan liuhosi dalan diálogu no respeitu mútua, iha ne’ebé laiha parte ida maka sente forsada no umillada.

“Nu’udar ita hotu nia intensaun atu haluan kooperasaun bilaterál ho Xina, liu-liu, iha área sira agrikultura sustentável, orgánika, industria ki’ik sira, komérsiu, teknolojia foun sira, enerjia renovável sira, konektividade, dizitalizasaun, intelijénsia artifisiál no infraestrutura nasionál no rurál sira,” dehan PR Horta.

Estadus Unidus Amérika sempre kontribui bebeik iha konstrusaun ba Estadu Timor-Leste. Ha’u-nia intensaun maka atu kontinua promove relasaun espesiál ida-ne’e. Maibé ho espesífika liu, ha’u hakarak haforsa liután importánsia iha Programa Millennium Challenge Coorporation; ha’u hato’o ha’u- nia apresiasaun ba US Navy Seabees ne’ebé hala’o operasaun iha Timor-Leste liu ona tinan 10, iha servisu hamutuk ho F-FDTL; no ita hakarak haree reativasaun ba programa sira US Peace Corps nian  iha área ensinu ba Lian Inglés no apoiu ba projetu sira dezenvolvimentu rurál nian.

  • Share

Leave a Reply

Your email address will not be published. Required fields are marked *

error: Content is protected !!