Hasoru PM Xanana, Embaixador Angola Koalia Kooperasaun ho Timor-Leste

DILI, www.news-viptv.com – Hodi deskuti forma koooperasaun bilateral entre Angola ho Timor-Leste, Embaixadór Ángola iha Timor-Leste (TL), José Andrade de Lemos hasoru Primeiru-Ministru (PM), Kay Rala Xanana Gusmão, Segunda (24/6/2024), iha Palacio do Governo, Dili.

Iha inkontru ne’e, Embaixador Jose Lemos informa area espesífiku sira ne’ebé deskuti ho Xefe Governu maka área turizmu, agrikultura, telekomunikasaun, edukasaun no interkâmbiu rekursu umanu ne’ebé timoroan no angolanu bele sai benefisiáriu.

Diskusaun ne’e hanesan aprezentasaun jerál no bainhira interesadu maka parte rua bele avansa bá estabelesimentu kooperasaun iha futuru.

Angola nu’udar nasaun membru pais CPLP iha kontinente Afrika ne’ebe mos kontribui ba luta independensia Timor-Leste nian durante okupasaun military Indonesia.