PR Ramos-Horta Inaugura Embaixada Timor-Leste iha Angola

LUANDA, www.news-viptv.com – Prezidenti Republika Jose Ramos Horta ho akompanamentu Ministru Negosiu Estranjeiru no Kooperasaun, Bendito Freitas inaugura Embaixada foun Timor-Leste nian iha Luanda, Angola, Tersa (9/7/2024).

Ko’alia iha serimónia ne’e, Prezidente Ramos-Horta hato’o agradesimentu ba Angola ne’ebé disponibiliza lalais espasu ba embaixada, ne’ebé marka pasu signifikativu ida hodi hametin relasaun diplomátiku entre nasaun rua ne’e.

Prezidente subliña importánsia istórika hosi dezenvolvimentu ne’e, hodi nota katak Angola hanesan nasaun afrikanu lian portugés dahuluk ne’ebé estabelese embaixada iha Dili.

“Angola nia prezensa ne’ebé progresu iha Ázia, ho misaun diplomátiku sira ne’ebé eziste ona iha Singapura no Jakarta, no subliña benefísiu mútua sira ne’ebé embaixada foun ne’e sei lori ba nasaun rua ne’e, nune’e mós ba CPLP,” hateten xefi estadu iha komunikadu imprensa ne’ebe redasaun assesu.

Ramos-Horta trasa planu sira ba rekrutamentu funsionáriu embaixada nian aleinde embaixadór, subliña nesesidade ba ekipa ida hodi implementa no ezekuta memorandu no akordu sira ne’ebé foin lalais ne’e asina. Prezidente iha konfiansa katak embaixada sei ativu tebes hodi haburas kooperasaun entre Timor-Leste no Angola.

Hanesan resposta, Ministru Negósiu Estranjeiru Angola nian konfirma katak nia nasaun asegura ona instalasaun sira iha Díli, ho embaixadór Angola nian vizita ona kapitál Timor nian. Ministru repete sentimentu amizade no solidariedade entre nasaun rua ne’e, hodi sita eis-Prezidente Angolanu, Agostinho Neto nia liafuan “Saida mak konta ba ita la’ós jeografia, maibé ideolojia”.