Governu Apoia US$ 500.000 ba São Tom e Principe

DILI, www.news-viptv.com – Hodi apoia Prezidensia Rotativa Komunidade País Lian Portugés (CPLP) ne’ebe monu ba São Tome e Principe, Governu Timor-Leste aprova ona osan ho montante US$ 500.000 ba São Tome e Principe.  

“Konsellu Ministrus aprova projetu Rezolusaun Governu, ne’ebé aprezenta hosi Primeiru-Ministru, Kay Rala Xanana Gusmão, relasiona ho donativu ba Repúblika Demokrátika São Tomé e Príncipe ho valór dolar amerikanu rihun atus lima, hodi apoia kustus ne’ebé mosu tanba Prezidénsia Rotativa Komunidade País Lian Portugés (CPLP, sigla iha lian portugés),” informa Governu liu husi komunikadu imprensa ne’ebe publika, Kuarta (12/3/2025), hafoin inkontru Konsellu Ministru.

Alende fo donativu ba São Tome e Principe, Konsellu Ministru aprova mos projetu Rezolusaun Governu, ne’ebé aprezenta hosi Ministru Negósius Estranjeirus no Kooperasaun, Bendito dos Santos Freitas, ba Kontribuisaun ne’ebé atribui ba Fundu Voluntáriu Sistema Koordenadór Rezidente Nasoins Unidas nian (FVS-KRNU), ho valór dolar amerikanu rihun atus rua (US$ 200.000).

Kontribuisaun ida-ne’e reforsa kompromisu Timor-Leste ba reforma sistema dezenvolvimentu Nasoins Unidas nian, ne’ebé promove hosi Sekretáriu-Jerál ONU, no ba implementasaun Ajenda tinan 2030 ba Dezenvolvimentu Sustentavel. Fundu Voluntáriu Sistema Koordenadór Rezidente nian ne’e nu’udar mekanizmu finanseiru ida ne’ebé estabelese hodi apoia no hametin funsaun koordenasaun ba atividade dezenvolvimentu Nasoins Unidas nian iha Estadus-membrus, hodi asegura efisiénsia, transparénsia no inkluzaun ne’ebé boot-liu iha inisiativa dezenvolvimentu.