PR Ramos-Horta Simu Premiu ‘Xave Maputo’ Husi Kapitál Mozambique

DILI, www.news-viptv.com – Prezidente Republika (PR), Jose Ramos-Horta hetan onra ho prémiu prestijiadu “Xave Maputo” hosi Konsellu Munisipál Maputo nian, sidade kapitál Mozambique nian.

Prémiu ne’e rekoñese Ramos-Horta nia realizasaun polítiku no akadémiku sira ne’ebé signifikativu, nune’e mós nia estatutu nu’udar laureadu Nobel ba Pás nian, iha Maputo, Mosambique 5 Jullu 2024.

Iha komunikadu Imprenssa ne’ebe redasaun simu esplika, premiu ne’e xefi estadu simu iha serimónia ne’ebé hala’o iha Asembleia Munisipál, Prezidente Konsellu Munisipál Maputo, Razaque Manhique, aprezenta pesoalmente “Xave Maputo” ba Prezidente Ramos-Horta. Prémiu ne’e fó tuir rezolusaun ida ne’ebé aprova hosi Asembleia, ne’ebé rekoñese nia servisu no realizasaun sira durante nia moris tomak.

Ramos-Horta, oras ne’e hala’o nia mandatu daruak nu’udar Prezidente Timor Lorosa’e (uluk kaer kargu ne’e husi tinan 2007 to’o 2012), hetan respeitu barak tanba ninia abilidade diplomátika no serbisu la kole iha rezolusaun konflitu. Nia hetan premiu Nobel da Pás iha tinan 1996 tanba nia esforsu atu hetan solusaun pasífiku ba konflitu iha Timor Lorosa’e.

Prémiu “Xave Maputo” hametin liu tan ligasaun entre Mosambike no Timor Lorosa’e, nasaun rua ne’ebé ko’alia lian portugés ho istória luta ba independénsia no esforsu konstrusaun nasaun nian ne’ebé tuir mai. Bainhira simu prémiu ne’e, Prezidente Ramos-Horta hato’o nia agradesimentu no reafirma nia kompromisu hodi haburas dame no kooperasaun entre nasaun rua ne’e.