ADVETORIAL SECOMS: Programa Sazonal Nian Ne’ebe Muda Moris Timoroan Sira

DILI, www.news-viptv.com – Menus kampu traballu iha Timor-Leste susar duni ba Timoroan barak mak asesu ba servisu hodi bele muda sira nia moris, maibe Politika IX Governu Konstitusional liu programa Sazonal ou haruka traballador ba Australia muda duni vida moris Timoroan lubuk ida ne’ebe tama ba programa ne’e.

Governu kontinua haruka traballador Timoroan ba Australia tamba benefisia ba Timoroan sira, liliu juventude sira ne’ebe benefisiaria ona ba programa refere.

Liu husi programa kooperasaun SECOMS ho VIP TV, konsege foti istoria susesu Timoroan sira ne’ebe susesu husi Australia.

Ezemplu maka Pedro Talias nu’udar traballador ida husi Oekusi ne’ebe benefisiaria husi programa PALM tinan 2023 ne’ebé hetan mudansa ba nia moris.

Publika nu’udar traballador ne’ebe hetan susesu iha PALM Scheme nia pajina, Timoroan husi enclave Oekusi ne’e antes fan deit sigaru hodi sustenta nia família, maibe depois hetan oportunidade hodi sai traballador iha Australia, depois fulan hitu servisu iha Austrália, Pedro halo nia planu sai realidade hanesan halo nia uma.

Husi uma ne’ebe iha deit kuartu ida, dadauk ne’e nia uma aumenta ona ba tolu. Laos halo bo’ot tan nia uma, husi osan ne’ebe nia hetan Servius iha Australia, Pedto bele sosa motor hodi nia uza sai transporte privadu ba nia no nia familia, inklui harii loja ida ba nia fe’en.

Maibé, Pedro nia susesu la para deit iha parte finanseiru. Nia aprende importansia atu jere nia tempu no disiplina, abilidade sira ne’ebé agora nia aplika iha nia vida lor-loron. Pedro mos valoriza amizade sira ne’ebé nia harii ho nia kolega sira husi Samoa no Solomon Islands, ne’ebé hanorin nia kona-ba valór husi servisu hamutuk no troka koñesimentu kultura.

Iha nia hela fatin, Pedro mehi atu fila fali ba Austrália hodi remata nia uma, sosa kareta, no sustenta nia oan sira nia edukasaun. “Karik hau bele fila fali, hau hakarak servisu tan hodi rai tan osan.”

Susesu hanesan hetan mos husi Maximiano Guterres husi Atabae, Munisipiu Bobonaro wainhira sai traballador iha Australia tinan 2022, ne’ebe tuir nia programa importante ba Timoroan, inklui nia rasik tamba liu husi programa ne’e nia hetan mudansa moris nian.

Antes ba, Maximiano nia servisu lor-loron maka buka ikan iha tasi, maibe wainhira servisu iha Perth, Australia iha parte packing modo, osan ne’ebe nia hetan bele realiza mehi ne’ebe nia iha.

“Osan ne’ebe hau hetan iha Australia lori halo ro’o, loke ristorante, oke restaurante, hadia uma, hola tum tum, no hakiak animal,” dehan Maximiano.

Nune’e mos Joel Martins Babo, husi Munisipiu Ermera ne’ebe ba Tasmania, Australia iha 2019 durante tinan rua ho balun iha industria hortikultura no ninia servisu lor-loron mak kuda no ko’a modo coly flower, brokoli, repollu inklui halo pakote.

Antes ba Australia, Joel ne’ebe iha mehi halo uma no loke negosiu rasik, ajuda deit nia apa iha plantasaunn kafe no ba fan.

“Fila husi Australia hau halo hau nia uma, loke kios, bengkel no fo aluga kadeira,” informa Joel Babo.

Programa Traballadór Sazonál nian ajuda dezenvolvimentu ekonómiku iha Illa Pasífiku sira no Timor-Leste hodi fó oportunidade atu serbisu iha sektór agrikultura ka sektór ótel nian iha Austrália. Programa Traballadór Sazonál nian ajuda sektór agrikultura no sektór otél nian atu hetan traballadór kuandu sira labele hetan traballadór lokál atu halo serbisu sazonál nian.

Istória susesu traballadór Timoroan iha Austrália bele hatudu katak sira nia esperiénsia li’ur hamosu ona abilidade no koñesimentu foun. Bainhira sira fila ba Timor, sira bele kontribui ho sira nia abilidade ne’ebé hetan ona iha Austrália no mós bele apoia familia no sosiedade nia hakarak.