TANE Konsumidor Husu Governu Kontrolo Folin Kombustivel

DILI, www.news-viptv.com – Relasina ho folin kombustivel ne’ebe fan karun liu husi estasaun kompana rai liur nian, kompara ho kompana rai laran, Asosiasaun TANE Konsumidor husu ba governu atu halo intervensaun no kontrola ba presu kombustivel nian.

Kontrola ne’e, esplika Prezidenti Tane Konsumidor, Robin Araujo, governu persiza halo tamba bele fo impaktu ba folin sasan no transporte sei sai.

Husi rezultadu levantamentu merkadu kona-ba presu kombustível iha estasaun 23 iha Dili ne’ebe Tane Konsumidor halo, rezultadu hatudu katak iha diferensa boot entre presu gasolina no gasóleo (solar), ne’ebé hamosu preokupasaun kona-ba konsisténsia presu no protesaun ba konsumidor sira.

Levantamentu ne’e hatudu katak presu gasolina varia entre $1.33 to’o $1.50 kada litru, no gasóleo varia entre $1.45 to’o $1.65 kada litru. Diferensa ida ne’e to’o 14%, ne’ebé konsidera boot ba produtu importante ida iha área ida deit.

Tamba ne’e, nia observa katak Kombustível mak produtu esensiál, no justisa iha presu importante tebes ba estabilidade ekonomia no moris di’ak ba konsumidór sira. TANE husu atu autoridade sira halo asaun lalais atu garante presu kombustível iha Timor-Leste sai transparente, kompetitivu no justu ba ema hotu.

Nune’e mos Prezidenti Bankada PLP iha Parlamentu Nasional, Maria Angelina Sarmento, ho folin kombustivel ne’ebe aumenta sa’e bebeik, hatudu katak governu laiha kapasidade tamba lakon poder kontrolu.

Deputada FRETILIN, Lidia dos Santos hateten, ho folin kombustivel ne’ebe sa’e bebeik, fo impaktu ona ba folin transporte publiku ne’ebe durante ne’e sai uniku transporte ba movimentasaun negosiu.

Hatan ba preokupasaun sira ne’e, Vise Ministru Assuntu Parlamentar, Aderito Hugo da Costa informa governu konsege halo kontrola folin kombustivel liu husi dekretu lei ne’ebe halo medida estabilizasaun temporáriu ba folin kombustivel nian no seguransa tuir decreto lei n.° 13/2026, 25 de março, artigo 2 kona-ba estabilizasaun presu ba konsumidór sira.

Tamba ne’e, husi kontrola ne’ebe governu halo, sedauk iha estasaun kombustivel maka hasa’e presu liu husi tabele folin ne’ebe mensiona ho dekretu lei katak ba folin gazolina ho folin US$ 1.50 no Gazoel ho US$ 1.65.