Vizita Timor-Leste, Sekretariu Jeral ASEAN Hasoru Malu PR Ramos-Horta no PM Xanana

DILI, www.news-viptv.com – Primeiru Ministru Kay Rala Xanana Gusmão simu vizita Sekretariu Jeral ASEAN, Dr. Kao Kim Houm ho nia delegasaun, Tersa (2/4/2024) dadersan iha Palacio do Governo, Dili.

Vizita sekretariu jeral ASEAN ne’ebe akompana hosi Vise Ministra assuntu ASEAN, Milena Rangel hodi koalia konaba processo Timor-Leste nian atu sai membru nasaun ASEAN.

Sekretariu Jeral ASEAN, Kao Kim Hourn iha konfiansa katak Timor-Leste bele sai ona full member ba organizasaun sudeste aziatiku nian ne’e.

Hafoin hasoru malu ho xefi governu, Sekretariu Jeral ASEAN ho nia delegasaun hasoru malu mos ho Prezidenti Republika Jose Ramos Horta.

Iha hasoru malu ne’e ho xefi estadu, Timor-Leste iha duni nia komitmentu hodi sai membru nasaun ASEAN.

Vizita Sekretariu-Jeral ASEAN iha Timor-Leste nu’udar vizita official dahuluk ne’ebe nia halo durante loron 3 hodi hatan ba konvite ofisiál Ministru Negosius Estranjeirus no Kooperasaun, Timor-Leste, Bendito Dos Santos Freitas.

Sekretariadu ASEAN ne’ebé lidera husi Sekretariu-Jeral fasilita, koordena no monitoriza implementasaun ASEAN nian ajenda oioin iha sira-nia pilár komunidade nian laran tomak. Vizita ne’e importante tebes tanba ASEC hala’o papél importante ida hodi tulun Estadu-membru ASEAN sira hodi avalia no halo relatóriu kona-ba Timor-Leste nia prontu atu sai membru ASEAN.

Sekretáriu-Jeral Kao Kim Hourn nia vizita reforsa kompromisu Estadu Membru ASEAN nian atu apoia Timor-Leste nia viajen hodi sai membru ASEAN tomak.

Alende hasoru entidade altu estadu no governu, nia mós sei marka prezensa iha serimónia lansamentu Timor-Leste Futuro Lider ba ASEAN, no hasoru malu ho Kamara Komersiu no Industria Timor-Leste no Embaixador sira husi ASEAN.