Rekonese Traballador Pilar Importante ba Kresimentu Ekonomia no Dezemvolvimentu, Governu Hasa’e tan USD 39 ba Salariu Minimu

DILI, www.news-viptv.com – Governu Timor-Leste iha komemorasaun Loron Mundial Traballador rekonese traballdor nu’udar pilar importante ba kresimentu ekonomia no dezemvolvimentu.

“Ita-bo’ot sira maka sai nu’udar pilár importante ba kresimentu sósiu-ekonómika no dezenvolvimentu Estadu no Nasaun Timor-Leste,” deklara Sekretáriu Estadu Formasaun Profisionál no Empregu (SEFOPE), Rogerio Araujo Mendonça iha nia intervensaun iha komemorasaun Loron Mundial Traballador ho tema “Hametin Diálogu Sosiál Liu Hosi Negosiasaun Koletiva Hodi Promove Traballu Dignu Iha Servisu-Fatin”,  ne’ebe realiza iha Kinta (30/4/2026), iha Centro Convençoes de Dili.

Membru Governu ne’e hateten, Loron Mundial traballadores sai hanesan determinasaun ida, hodi hari’i mundu traballu ne’ebé onra dignidade ba ema ida-idak, promove justisa sosiál no oferese esperansa no oportunidade ba traballadór sira hotu iha Timor-Leste no ba timoroan sira ne’ebé servisu iha rai-estranjeiru. Momentu ne’e mós, sai nu’udar loron-importante ba traballadór sira, no entidade sira ne’ebé involvidu, liuliu, ba SEFOPE atu kontribui ba dezenvolvimentu ekonómiku no sosiál iha Estadu Timor-Leste nian, inklui responsável ba promove formasaun profisionál no fasilita asesu ba empregu, tantu iha Timor-Leste no ba iha rai-Estranjeiru.

“Ita presija haforsa kompromisu hodi garante mundu traballu ida-ne’ebé digno, saláriu justu, hetan seguransa saude ne’ebe diak iha fatin servisu, desenvolve abilidade trabalhadores no iha direitu trabalhador sira ne’ebé justo hodi garante produtividade ne’ebe diak ba empregador, ,” dehan sekretariu estadu ne’e.

Nia afirma, traballador sira nia serbisu la’ós de’it kontribuisaun ba ekonómika, maibe sai mos hanesan herói  ba dezenvolvimentu economia nasaun nian.

“La ho ita-boot sira nia kontribuisaun, laiha kreximentu economia ne’ebe maka diak iha ita nia pais, laiha inovasaun no laiha futuru ida ne’ebe maka garante prospero iha futuru,” nia hateten.

Hodi rekonese importansia traballador sira, governu, nia esplika, marka etapa istóriku halo ona revizaun ba Salário Mínimo no espansaun mobilidade laborál, ne’ebe submete ona ba MCAE hodi apresenta iha Konsellu Ministru.

Tuir informasaun ne’ebe iha, salariu minimu Timor-Leste governu sei halo revisaun husi USD 115 ba sa’e USD 154. Husi numeru ne’e signifika governu konkorda ona hasa’e USD 39.

Iha komemorasaun loron ne’e, membru governu ne’e mos husu ba Kna’ar Tripartida nian hodi promove traballu dignu, inklusivu no ekilíbriu iha Timor-Leste. Conselho Nacional do Trabalho (CNT) no Conselho de Arbitragem do Trabalho (CAT), sira exerse kna’ar importante tebes ba promove relasaun traballu ne’ebé dignu, saudável no harmónia iha Timor-Leste, inklui rezolve konflitu laborál.

“Ita iha esperansa katak, momentu ohin sei hahú loke pájina foun ba ita hotu-hotu, tripartida: atu serbisu hamutuk ba futuru Timor-Leste ida ne’ebé garante duni justisa sosiál, traballu dignu, solidáriu no dame iha serbisu fatin iha Timor-Leste. Atu halo Timor-Leste sai Uma ida ba Timoroan hotu atu hala’o sira-nia moris ho prósperu.hodi hari futuru ida ne’ebé nabilan, justu, no prósperu,” nia hateten.

Apela mos Empregadór sira atu respeitu Lei Traballu. Keta hare empregadu sira hanesan kusta de’it, maibé hanesan parseiru ne’ebé valiozu tebes ba lukru no progresu. Traballadór ne’ebé hetan respeitu maka traballadór ne’ebé produtivu.

Hola prezensa mos iha komemorasaun Sekretáriu Estadu Koperativa, Eng. Arsenio Pereira da Silva, Embaixadora Austrália iha Timor-Leste, Embaixadora Nova Zelândia iha Timor-Leste, reprezentante CCI-TL no KSTL.