Dada Kadoras Mai TL, Konsellu Ministru Autoriza US$ 16 Miliaun ba Despeza Dezemvolve Kampu GSR

DILI, www.news-viptv.com – Hodi garante kadoras mina dada mai Timor-Leste, Konsellu Ministru autoriza ona despeza ba Dezenvolvimentu kampu gás Greater Sun Rise (GSR) nian no atu garante katak kadoras ne’e dada mai Timor-Leste.

Autorizaun despeza ne’e aprova liu husi sorumutu Konsellu Ministru, tersa (4/11/2025), tuir projetu ne’ebé aprezenta hosi Ministru Petróleu no Rekursus Minerais, Francisco da Costa Monteiro.

Ho deliberasaun ida-ne’e, Konsellu Ministrus autoriza despeza ho montante totál US$ 16.055.897, ne’ebé sei ezekuta entre tinan 2025 no 2027, ne’ebé ho objetivu atu implementa Programa A13 hosi Orsamentu Jerál Estadu nian, ne’ebé inklui dezenvolvimentu hosi kampu gás GSR no realizasaun estudu no inisiativa nesesáriu sira hodi garante kadoras dada mai Timor-Leste.

Montante autorizadu ne’e kobre realizasaun levantamentu jeofíziku no sízmiku ho rezolusaun ultra-alta (UHRS) relasiona ho gazodutu esportasaun gás Greater Sunrise no gazodutu Bayu Undan, ne’ebé esensiál ba faze téknika no planeamentu projetu nian.