España Interese Apoia TL iha Dezenvolvimentu Enerjétiku

DILI, www.news-viptv.com   – Governu España iha interese hakarak fó apoiu bá dezenvolvimentu Timor-Leste (TL) nian, liu-liu iha dezenvolvimentu enerjétiku.

Embaixadór España la’ós Rezidente, Francisco de Asis Alguileira Aranda ko’alia ona asuntu ne’e ho Primeiru-Ministru (PM), Kay Rala Xanana Gusmão iha kuarta (12/03/2025) iha Palacio Governu Dili.

Iha Komunikadu Imprensa ne’ebe redasaun asesu, Diretór Jerál bá Amérika Norte, Europa Leste, Ázia no Pasífiku iha Ministériu Negósiu Estranjeiru, Uniaun Europeia no Kooperasaun hosi España, Luis Fonseca Sanchez ne’ebé akompaña Francisco de Asis Alguileira Aranda esplika, Espãna hakarak duni atu apoia Timor-Leste.

“Ami ko’alia kona-bá planu sira involvimentu iha dezenvolvimentu seitór enerjétiku no destaka mós buat ne’ebé ami iha hanesan ho Timor-Leste maka demokrasia,” Luis Fonseca Sanchez hateten.

España mós apoia adezaun Timor-Leste nian bá Association of Southeast Asian Nations (ASEAN), espera katak tinan ne’e TL sai ona membru plenu.

Iha 16 Jullu 2024, Embaixadór España, Francisco de Asís Aguilera Aranda hasoru malu ona ho Xefe Governu, Kay Rala Xanana Gusmão hodi halo revizaun ba kestaun komún sira ne’ebé sei iha interese mútuo.