Xina Komitmentu Apoia Dezenvolvimentu Timor-Leste

DILI, www.news-viptv.com – Governu Xina kontinua re-afirma kompromisu atu fó apoiu bá dezenvolvimentu iha Timor-Leste (TL) liu-hosi akordu kooperasaun ne’ebé estadu rua estabelese ona.

Vise-Ministru Negósiu Estranjeiru Repúblika Populár Xina, Sun Weidong hato’o ona kompromisu ne’e bá Primeiru-Ministru (PM), Kay Rala Xanana Gusmão, iha Palásiu Governu, tersa (17/12/2024).

“Ministru Negosiu Estranjeiru Xina nian mai koalia kona ba kooperasaun ho Timor-Leste. Ita agradese teb-tebes membru governu ida maid ala ida tan. Ami la deskuti asuntu detallada, maibe fo hatene ba malu deit. Sira mai atu afirma nafatin vontade hodi ajuda Timor-Leste iha dezenvolvimentu,” hateten Primeiru-Ministru Xanana Gusmão hafoin enkontru, tuir publikasaun media GPM iha nia Akun Offisial FB.

Sun Weidong sente previlejiadu hodi hasoru-malu ho Primeiru-Ministru, Xanana Gusmão atu re-afirma hikas kompromisu sira entre nasaun rua nian.

Xina ho Timor-Leste hanesan belun di’ak no mós parseiru bá kooperasaun dezde kedan inísiu TL restaura ninia independénsia totál nu’udár Estadu Soberanu.

Tinan kotuk, Xina onradu simu Primeiru-Ministru, Kay Rala Xanana Gusmão ne‘ebé partisipa iha serimónia abertura Jogu Aziátiku bá dala 19 iha Hangzhou no Prezidente Xina, Xi Jinping realiza enkontru ida ne’ebé susesu tebes ho Xanana Gusmão no konsege atualiza parseria estratéjiku ida ne’ebé kompriensivu liu.

Ho vizita Prezidente Repúblika, José Ramos Horta iha inísiu tinan 2024, sai mós onra ida bá Xina liu-hosi konkordánsia ida atu avansa hamutuk bá objetivu jerál.

Hosi ne’e mós oferese orientasaun estratéjiku bá nasaun rua, hodi hametin liu-tán relasaun ne’ebé foka bá área prinsipál sira mak hanesan indústria, infraestrutura no agrikultura.

Iha vizita ida-ne’e, Sun Weidong hakarak atu implementa liu-tán konsensu líder sira nian hodi promove kooperasaun iha prátika.

Enkontru ne’e, Primeiru-Ministru akompaña hosi Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Vise-Ministra Asuntu ASEAN, Milena Maria da Costa Rangel. Enkuantu, Vise-Ministru Sun Weidong akompaña hosi Embaixadora Xina iha TL, Wang Wenli.

Sun Weidong sei hasoru-malu mós ho membru Governu sira seluk, hodi deskute detallada kona-bá asuntu konkretu kooperasaun nian.